अकोला : ऑनलाइन किराणा मागवणाऱ्या ग्राहकांसाठी धक्कादायक माहिती समोर आली आहे. अकोल्यातील एका अत्यंत अस्वच्छ गोदामातून ऑनलाइन किराणा मालाचा पुरवठा केला जात असल्याचे अन्न व औषध प्रशासनाच्या (एफडीए) तपासात उघड झाले आहे. अन्न सुरक्षा आयुक्त तुकाराम मुंढे यांच्या निर्देशानुसार करण्यात आलेल्या कारवाईत ऑनलाइन ग्रोसरी सेवा देणाऱ्या ब्लिंक कॉमर्स प्रायव्हेट लिमिटेड (ब्लिंकिट) या कंपनीचा अन्न व्यवसाय परवाना तात्काळ निलंबित करण्यात आला आहे. एफडीएच्या अधिकाऱ्यांनी दोन टप्प्यांत गोदामाची तपासणी केली असता धूळ, कचरा, अस्ताव्यस्त साठवणूक आणि स्वच्छतेच्या नियमांचे गंभीर उल्लंघन आढळून आले. १२ ऑगस्ट रोजी अकोल्यातील कवार नगर येथील गोदामाची प्रथम तपासणी करण्यात आली होती. तपासणीनंतर १३ ऑगस्ट रोजी कंपनीला सुधारणा नोटीस बजावून आवश्यक त्रुटी दूर करण्याचे निर्देश देण्यात आले. त्यानंतर कंपनीने २१ ऑगस्ट रोजी ऑनलाइन खुलासा सादर केला. मात्र, ३१ ऑगस्ट रोजी झालेल्या फेरतपासणीतही बहुतांश त्रुटी कायम असल्याचे स्पष्ट झाले. त्याच दिवशी सुनावणी घेतल्यानंतर एफडीएने कंपनीचा अन्न व्यवसाय परवाना निलंबित करण्याचा निर्णय घेतला.
फेरतपासणीत अनेक गंभीर अनियमितता समोर आल्या. गोदामातील ‘वॉक-इन चिलर’ आणि ‘फ्रीझर’च्या प्रवेशद्वारावरील प्लास्टिकचे पडदे फाटलेले, पिवळसर आणि खराब अवस्थेत असल्याचे आढळले. रॅकची रचना अयोग्य असल्याने स्वच्छता राखणे कठीण होत होते. खाद्यपदार्थ आणि अखाद्य साहित्य एकाच ठिकाणी साठवले जात होते. अनेक खाद्यपदार्थांचे खोके आणि पाकिटे थेट जमिनीवर ठेवण्यात आली होती. रॅकखाली मोठ्या प्रमाणावर धूळ आणि कचरा साचलेला होता. गोदामात नियमित स्वच्छतेचे कोणतेही वेळापत्रक नव्हते. याशिवाय अन्न हाताळणारे कर्मचारी हातमोजे, हेडकॅप यांसारखी आवश्यक सुरक्षा साधने न वापरताच काम करत असल्याचेही निदर्शनास आले. तपासणीदरम्यान अधिकाऱ्यांनी मागवलेली खरेदी-विक्रीची बिले आणि अन्न सुरक्षा अंकेक्षण अहवालही कंपनीकडून सादर करण्यात आले नाहीत. वारंवार सूचना देऊनही आवश्यक सुधारणा न झाल्याने एफडीएने कठोर भूमिका घेत परवाना निलंबित केला. या कारवाईमुळे ऑनलाइन ग्रोसरी क्षेत्रात मोठी खळबळ उडाली असून, ग्राहकांच्या आरोग्याशी तडजोड करणाऱ्या कोणत्याही कंपनीविरुद्ध कठोर कारवाई सुरूच राहणार असल्याचा स्पष्ट संदेश प्रशासनाने दिला आहे.
