वसई : मासेमारी हंगाम सुरू झाल्यानंतर बाजारात ताज्या माशांची मोठ्या प्रमाणावर आवक झाल्याने मासळीचे दर कमी झाले असून खरेदीसाठी ग्राहकांची गर्दी वाढू लागली आहे. मात्र, याच पार्श्वभूमीवर मासे खरेदी करणाऱ्यांना सावध करणारा एक व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये मासे विक्री करणारी एक महिला बोंबीलांच्या धडाला गुलाबी रंगाच्या द्रवात बुडवून पुन्हा विक्रीसाठी ठेवताना दिसत असल्याचा दावा करण्यात आला आहे. व्हिडिओ शेअर करणाऱ्यांच्या म्हणण्यानुसार, ही घटना बोरिवलीहून विरारकडे जाणाऱ्या लोकल ट्रेनमध्ये सकाळी सुमारे ७.३० वाजता घडल्याची माहिती आहे. ऑगस्ट महिन्यापासून मासेमारी हंगामाला सुरुवात झाल्याने दोन महिन्यांच्या विश्रांतीनंतर मासेमारी नौका पुन्हा समुद्रात उतरल्या आहेत. त्यामुळे बाजारात ताजे मासे मोठ्या प्रमाणावर उपलब्ध झाले आहेत. दुसरीकडे श्रावण महिन्यात अनेकांनी शाकाहार स्वीकारल्यामुळे माशांच्या मागणीत काहीशी घट झाली असून त्याचा परिणाम दरांवर झाला आहे. कमी दरामुळे ग्राहकांची बाजारपेठांकडे पुन्हा गर्दी वाढत असतानाच हा व्हिडिओ समोर आल्याने ग्राहकांमध्ये संभ्रम आणि चिंता निर्माण झाली आहे.
व्हिडिओमध्ये दिसणारा गुलाबी द्रव नेमका काय आहे, याबाबत अद्याप कोणतीही अधिकृत माहिती समोर आलेली नाही. काही सोशल मीडिया वापरकर्त्यांनी तो रासायनिक रंग असल्याचा दावा केला आहे, तर काहींनी तो कोकमाचा आगळ किंवा इतर नैसर्गिक द्रव असू शकतो, असे म्हटले आहे. मात्र, कोणत्याही प्रकारचा रंग किंवा रसायन वापरून मासे अधिक ताजे दिसावेत असा प्रयत्न केला जात असेल, तर तो ग्राहकांची दिशाभूल करणारा प्रकार ठरू शकतो, अशी प्रतिक्रिया व्यक्त होत आहे. अशा प्रकारच्या पदार्थांचा वापर आरोग्यासाठीही घातक ठरू शकतो, अशी भीती व्यक्त केली जात आहे. त्यामुळे या व्हायरल व्हिडिओची सत्यता पडताळून संबंधित महिलेची चौकशी करण्यात यावी आणि दोषी आढळल्यास तिच्यावर कठोर कारवाई करावी, अशी मागणी नेटकऱ्यांकडून करण्यात येत आहे. दरम्यान, या व्हिडिओची अधिकृत पुष्टी अद्याप झालेली नसून रेल्वे प्रशासन तसेच अन्न व औषध प्रशासनाकडून याबाबत कोणतीही अधिकृत प्रतिक्रिया देण्यात आलेली नाही. त्यामुळे ग्राहकांनीही व्हायरल व्हिडिओंवर विश्वास ठेवण्यापूर्वी अधिकृत माहितीची प्रतीक्षा करावी, असे आवाहन करण्यात येत आहे.
