पुणे : पावसाळा सुरू होताच निसर्गसौंदर्याचा आनंद घेण्यासाठी लोणावळा आणि परिसरात मोठ्या संख्येने पर्यटक दाखल होतात. धबधबे, किल्ले, दऱ्या आणि निसर्गरम्य ठिकाणांमुळे हा परिसर राज्यातील सर्वाधिक लोकप्रिय पर्यटनस्थळांपैकी एक मानला जातो. मात्र, यंदाच्या मुसळधार पावसामुळे अनेक ठिकाणी अत्यंत धोकादायक परिस्थिती निर्माण झाली आहे. धरणांमधून मोठ्या प्रमाणात पाण्याचा विसर्ग, वेगाने वाहणारे धबधबे, घसरडे रस्ते आणि किल्ल्यांवरील निसरड्या वाटांमुळे अपघातांचा धोका लक्षणीयरीत्या वाढला आहे. पर्यटकांच्या सुरक्षेला प्राधान्य देत पुणे जिल्हाधिकारी जितेंद्र डुडी यांनी महत्त्वाचा प्रतिबंधात्मक आदेश जारी केला असून, लोणावळ्यातील १० प्रमुख पर्यटनस्थळांवर ३१ ऑगस्टपर्यंत पर्यटकांना जाण्यास पूर्णपणे बंदी घालण्यात आली आहे. दरवर्षी पावसाळ्यात निष्काळजीपणामुळे अनेक अपघात घडत असल्याने यंदा कोणतीही जीवितहानी टाळण्यासाठी प्रशासनाने ही कठोर भूमिका घेतली आहे. त्यामुळे येत्या काही दिवसांत लोणावळा सहलीचा बेत आखणाऱ्या पर्यटकांनी या आदेशाची नोंद घेऊन नियोजन करावे, असे प्रशासनाने स्पष्ट केले आहे. बंदी असलेल्या ठिकाणी प्रवेश करण्याचा प्रयत्न करू नये आणि सुरक्षेच्या नियमांचे पालन करावे, असे आवाहनही करण्यात आले आहे.
जिल्हाधिकाऱ्यांच्या आदेशानुसार बंदी घालण्यात आलेल्या ठिकाणांमध्ये भाजे धबधबा, लोहगड किल्ला, विसापूर किल्ला, तिकोणा किल्ला, तुंग किल्ला, टायगर पॉईंट, लायन्स पॉईंट, शिवलिंग पॉईंट, कार्ला लेणी आणि पवना धरण या अत्यंत लोकप्रिय पर्यटनस्थळांचा समावेश आहे. विशेषतः आठवड्याच्या शेवटी या ठिकाणी हजारो पर्यटकांची गर्दी होत असल्याने सुरक्षिततेच्या दृष्टीने हा निर्णय घेण्यात आला आहे. प्रशासनाने स्पष्ट इशारा दिला आहे की, बंदी आदेशाचे उल्लंघन करून या ठिकाणी प्रवेश करणाऱ्या किंवा लपून-छपून जाण्याचा प्रयत्न करणाऱ्या व्यक्तींवर कठोर कायदेशीर कारवाई केली जाईल. त्यामुळे कोणताही मनस्ताप, अपघात किंवा कायदेशीर अडचण टाळण्यासाठी पर्यटकांनी ३१ ऑगस्टपर्यंत या सर्व ठिकाणी जाणे टाळावे आणि प्रशासनाला सहकार्य करावे. पावसाळ्यात निसर्गाचा आनंद घेताना स्वतःची आणि इतरांची सुरक्षितता जपणे हेच सर्वांत महत्त्वाचे असल्याचे प्रशासनाने पुन्हा एकदा अधोरेखित केले आहे.
