मुंबई : सनदी अधिकारी तुकाराम मुंडे यांनी अन्न व औषध प्रशासन (एफडीए) विभागाची सूत्रे हाती घेतल्यानंतर राज्यभर भेसळखोरांविरोधातील कारवायांना वेग आला असून विविध जिल्ह्यांमध्ये धडक मोहिमा राबविण्यात येत आहेत. या पार्श्वभूमीवर मुंबईतील दहिसर परिसरात एफडीएने दूध भेसळीच्या मोठ्या रॅकेटचा पर्दाफाश करत महत्त्वाची कारवाई केली आहे. गेल्या काही दिवसांपासून दहिसर बृहन्मुंबई विभागात मोठ्या प्रमाणावर दुधात भेसळ होत असल्याची माहिती प्रशासनाला मिळाली होती. या माहितीची पडताळणी करून अधिकाऱ्यांनी नियोजनबद्ध सापळा रचत संबंधित ठिकाणी छापा टाकला. कारवाईदरम्यान अतिशय सफाईने आणि गुप्तपणे दूध भेसळ केली जात असल्याचे उघड झाले. या संपूर्ण प्रकाराचा व्हिडीओही समोर आला असून भेसळ कशा पद्धतीने केली जात होती, याची धक्कादायक माहिती त्यातून समोर आली आहे. एफडीएच्या पथकाने या कारवाईत तब्बल ४७० लिटर भेसळयुक्त दूध जप्त केले. हे दूध अत्यंत अस्वच्छ आणि घातक पद्धतीने तयार करण्यात येत असल्याचे तपासात आढळून आले. नागरिकांच्या आरोग्याशी थेट संबंधित असलेल्या या प्रकाराची गंभीर दखल घेत प्रशासनाने जप्त केलेले दूध मानवी वापरासाठी अयोग्य घोषित केले. त्यानंतर सुमारे २९ हजार ७५० रुपये किमतीचे संपूर्ण दूध जागेवरच नष्ट करण्यात आले. या कारवाईमुळे परिसरातील दूध भेसळ करणाऱ्यांमध्ये मोठी खळबळ उडाली असून अन्न सुरक्षा नियमांचे उल्लंघन करणाऱ्यांविरोधात प्रशासनाने कठोर भूमिका घेतल्याचे स्पष्ट झाले आहे.
या प्रकरणी दहिसर पोलिस ठाण्यात अन्न सुरक्षा आणि मानके कायद्यांतर्गत गुन्हा दाखल करण्यात आला असून एफआयआर नोंदविण्यात आला आहे. कारवाईदरम्यान पोलिसांनी एका आरोपीला रंगेहात पकडून अटक केली असून या रॅकेटमध्ये आणखी कोणाचा सहभाग आहे का, याचा सखोल तपास सुरू करण्यात आला आहे. दूध भेसळ प्रकरणामागील संपूर्ण साखळी उघड करण्यासाठी पोलिस आणि अन्न व औषध प्रशासन संयुक्तपणे तपास करत आहेत. नागरिकांच्या आरोग्याशी कोणत्याही प्रकारची तडजोड सहन केली जाणार नाही, असा स्पष्ट इशारा प्रशासनाने दिला असून अशा प्रकारच्या बेकायदेशीर कृत्यांविरोधात पुढेही सातत्याने धडक कारवाया सुरू राहतील, असे सांगण्यात आले आहे. अन्नपदार्थांमध्ये भेसळ करणाऱ्यांविरोधात कठोर कायदेशीर कारवाई केली जाईल, असेही प्रशासनाने स्पष्ट केले. तसेच नागरिकांनी दूध किंवा इतर अन्नपदार्थ खरेदी करताना सावधगिरी बाळगावी, संशयास्पद बाब आढळल्यास तातडीने अन्न व औषध प्रशासन किंवा संबंधित यंत्रणेकडे तक्रार नोंदवावी, असे आवाहन करण्यात आले आहे. एफडीएच्या या कारवाईमुळे सर्वसामान्यांच्या आरोग्याच्या संरक्षणासाठी प्रशासन अधिक सतर्क असल्याचा संदेश गेला असून राज्यभर सुरू असलेल्या भेसळविरोधी मोहिमेला यामुळे आणखी बळ मिळाल्याचे मानले जात आहे.
