मुंबई : राज्य भरात सध्या उष्णतेची तीव्र लाट आणि वाढता उकाडा यामुळे जनजीवन विस्कळीत झाले असून नागरिकांना मोठ्या त्रासाला सामोरे जावे लागत आहे. विशेषतः शालेय विद्यार्थ्यांवर या बदलत्या आणि कडक हवामानाचा सर्वाधिक परिणाम होत असल्याचे चित्र आहे. अनेक शाळा दुपारच्या सत्रात भरत असल्याने विद्यार्थ्यांना कडक उन्हात प्रवास करावा लागत असून त्याचा त्यांच्या आरोग्यावर प्रतिकूल परिणाम होत आहे. वाढत्या तापमानामुळे विद्यार्थ्यांमध्ये थकवा, अशक्तपणा, निर्जलीकरण, डोकेदुखी आणि उष्माघाताचा धोका वाढत असल्याची चिंता पालकांकडून व्यक्त केली जात आहे. त्यामुळे विद्यार्थ्यांच्या आरोग्याची काळजी घेण्यासाठी पुढील १५ दिवस राज्यातील सर्व शाळा केवळ सकाळच्या सत्रात भरवण्यात याव्यात, अशी मागणी आता जोर धरू लागली आहे. पालकांसह विविध शिक्षक संघटनांनीही या मागणीला पाठिंबा दिला असून शासनाने परिस्थितीचे गांभीर्य लक्षात घेऊन तातडीने निर्णय घ्यावा, अशी अपेक्षा व्यक्त केली जात आहे.
दुपारच्या वेळेत उन्हाची तीव्रता अधिक असल्याने विद्यार्थ्यांना शाळेत ये-जा करताना मोठा त्रास सहन करावा लागत आहे. ग्रामीण भागासह शहरांमध्येही तापमानाचा पारा सातत्याने वाढत असल्यामुळे शालेय विद्यार्थ्यांच्या सुरक्षिततेचा प्रश्न ऐरणीवर आला आहे. अनेक ठिकाणी पालकांनी आपल्या मुलांच्या आरोग्याविषयी चिंता व्यक्त करत शाळांच्या वेळांमध्ये बदल करण्याची मागणी केली आहे. शिक्षक संघटनांचे म्हणणे आहे की, सकाळच्या सत्रात शाळा भरवल्यास विद्यार्थ्यांना उन्हाचा त्रास कमी होईल आणि त्यांच्या आरोग्यावर होणारा परिणामही टाळता येईल. यापूर्वीही अतिवृष्टी, थंडीची लाट किंवा उष्णतेच्या पार्श्वभूमीवर शाळांच्या वेळांमध्ये बदल करण्याचे निर्णय घेण्यात आले आहेत. त्यामुळे सध्याची परिस्थिती लक्षात घेऊन विद्यार्थ्यांच्या हितासाठी पुढील काही दिवस शाळांचे वेळापत्रक सकाळच्या सत्रापुरते मर्यादित करावे, अशी मागणी अधिक तीव्र होत आहे. आता शासन आणि शिक्षण विभाग याबाबत काय निर्णय घेतात, याकडे राज्यातील लाखो विद्यार्थी, पालक आणि शिक्षकांचे लक्ष लागले आहे.
