नालासोपारा : नालासोपारा पूर्वेतील आचोळे गाव परिसरात राहणाऱ्या २२ वर्षीय अभिनेत्री संचिता उगले यांचे निधन झाल्याची घटना समोर आली असून, या प्रकरणाचा सर्व अंगांनी तपास सुरू असल्याची माहिती पोलिसांनी दिली आहे. या घटनेमुळे परिसरासह मनोरंजन क्षेत्रातही हळहळ व्यक्त केली जात आहे. मिळालेल्या माहितीनुसार, शनिवारी सायंकाळी त्यांच्या राहत्या घरी ही घटना घडली. कुटुंबीयांच्या लक्षात आल्यानंतर त्यांना तातडीने रुग्णालयात नेण्यात आले. मात्र, डॉक्टरांनी तपासणीनंतर त्यांना मृत घोषित केले. घटनेची माहिती मिळताच आचोळे पोलीस घटनास्थळी दाखल झाले आणि आवश्यक पंचनामा करून पुढील तपास प्रक्रिया सुरू केली. पोलिसांनी मृतदेह शवविच्छेदनासाठी पाठवला असून, अधिकृत अहवालानंतरच मृत्यूचे नेमके कारण स्पष्ट होणार असल्याचे सांगितले आहे.
या प्रकरणी अभिनेत्रीच्या वडिलांनी दिलेल्या तक्रारीच्या आधारे आचोळे पोलिसांनी आकस्मिक मृत्यूची नोंद केली आहे. पोलिसांच्या मते, सध्या कोणत्याही निष्कर्षापर्यंत पोहोचणे योग्य नसून तपास पूर्ण झाल्यानंतरच अधिक माहिती समोर येईल. संचिता उगले यांनी दूरचित्रवाणी आणि चित्रपट क्षेत्रात अल्पावधीत स्वतःची वेगळी ओळख निर्माण केली होती. त्यांनी अनेक लोकप्रिय हिंदी मालिकांमध्ये काम केले होते. तसेच अलीकडे प्रदर्शित झालेल्या ‘छावा’ चित्रपटातही त्यांनी भूमिका साकारली होती. त्यांच्या निधनाच्या वृत्तामुळे चाहत्यांमध्ये आणि कलाविश्वात शोककळा पसरली असून अनेकांनी सोशल मीडियाच्या माध्यमातून श्रद्धांजली अर्पण केली आहे. दरम्यान, या घटनेमागील कारणांचा शोध घेण्यासाठी पोलिसांकडून सखोल तपास सुरू आहे.
