वसई : ऑनलाईन औषध विक्री अर्थात ई-फार्मसीविरोधात अखिल भारतीय औषध विक्रेता संघटना यांनी देशव्यापी बंदची हाक दिली असून, त्याचा परिणाम वसई-विरार परिसरातही दिसून येणार आहे. बुधवारी, २० मे रोजी शहरातील बहुतांश औषध विक्रीची दुकाने २४ तास बंद राहणार आहेत. मात्र, रुग्णांच्या गैरसोयी टाळण्यासाठी काही हॉस्पिटल मेडिकल्स आणि अत्यावश्यक सेवा सुरू ठेवण्यात येणार असल्याची माहिती वसई मेडिकल असोसिएशन कडून देण्यात आली आहे. सध्या ऑनलाईन पद्धतीने घरबसल्या औषधे मागवण्याचे प्रमाण झपाट्याने वाढत असून, या माध्यमातून बेकायदेशीर आणि अनियंत्रित औषध विक्री होत असल्याचा आरोप संघटनेकडून करण्यात आला आहे. ड्रग्ज अँड कॉस्मेटिक्स ॲक्ट आणि संबंधित नियमांचे उल्लंघन करून ऑनलाईन विक्रेते औषधांची विक्री करत असल्याचा दावा औषध विक्रेत्यांनी केला आहे. तसेच मोठ्या कॉर्पोरेट कंपन्यांकडून दिल्या जाणाऱ्या अवाजवी सवलतींमुळे छोट्या आणि मध्यम औषध विक्रेत्यांवर आर्थिक संकट ओढवले असल्याचेही सांगण्यात आले.
संघटनेच्या मते, ऑनलाईन औषध विक्रीमुळे रुग्णांच्या सुरक्षिततेवरही प्रश्नचिन्ह निर्माण झाले आहे. त्यामुळे ई-फार्मसीसंदर्भातील जीएसआर ८१७ (ई) आणि जीएसआर २२० (ई) या अधिसूचना मागे घेण्याची मागणी संघटनेकडून करण्यात आली आहे. या मागण्यांसंदर्भात शासनाकडे निवेदनही सादर करण्यात आले आहे. बंदमुळे वसई-विरारमधील नागरिकांना औषधे मिळवण्यासाठी अडचणींचा सामना करावा लागू शकतो. काही नागरिकांना औषधांसाठी लांबचा प्रवास करावा लागण्याची शक्यता व्यक्त केली जात आहे. यामुळे रुग्णांच्या सोयीसाठी पर्यायी व्यवस्था करण्याची मागणी राष्ट्रीय ग्राहक संघटना चे अध्यक्ष शंकर बने यांनी केली आहे. दरम्यान, बंदच्या काळात आणीबाणी आणि अत्यावश्यक वैद्यकीय सेवा सुरू राहतील. तसेच वसई तालुक्यातील सर्व हॉस्पिटल मेडिकल्समधून औषध विक्री सुरू ठेवण्यात येणार असल्याची माहिती महेश चौधरी यांनी दिली आहे.
बंदच्या काळात ‘ही’ दुकाने राहणार खुली :
वसई पश्चिम परिसर
१) कार्डिनल ग्रेशिअस हॉस्पिटल फार्मसी
२) ओम साई मेडिकल स्टोअर्स, रमेदी
३) डी’सोझा मेडिकल स्टोअर्स हॉस्पिटल, रमेदी
४) गोल्डन पार्क केमिस्ट हॉस्पिटल, साई नगर
५) अक्षय केमिस्ट हॉस्पिटल, अंबाडी रोड
६) डिव्हाइन हॉस्पिटल फार्मसी, समता नगर
वसई पूर्व
१) आयासिस हॉस्पिटल फार्मसी, एव्हरशाईन
२) एव्हरशाईन हॉस्पिटल फार्मसी, एव्हरशाईन सिटी
३) मेडिप्राइम हॉस्पिटल
४) प्लॅटिनम हॉस्पिटल, रेंज ऑफिस
५) वालवादेवी हॉस्पिटल, वालीव नाका
६) सातिवली केमिस्ट हॉस्पिटल, सातिवली
