पुणे : शहरातील वाढत्या गुन्हेगारीच्या पार्श्वभूमीवर पिंपरी-चिंचवड गुन्हे शाखेने मोठी कारवाई करत चार तरुणांना अटक केली आहे. कुरिअर आणि डिलिव्हरी बॉय म्हणून काम करणाऱ्या या आरोपींकडून पोलिसांनी ९ बेकायदेशीर पिस्तुले, ४६ जिवंत काडतुसे आणि ५ अतिरिक्त मॅगझिन जप्त केली आहेत. सुमारे ८ लाख रुपये किमतीचा हा शस्त्रसाठा जप्त करण्यात आल्याने शहरात खळबळ उडाली आहे. अटक करण्यात आलेल्यांमध्ये अझरुद्दीन रफिक सुतार, वैभव अशोक शेटे, सौरव धनंजय जाधव आणि अक्षय अशोक कांबळे यांचा समावेश आहे. पोलिसांच्या माहितीनुसार, आरोपी सर्वसामान्य नागरिकांमध्ये सहज मिसळण्यासाठी कुरिअर बॉय, डिलिव्हरी बॉय आणि वाहन चालक म्हणून काम करत होते. डिलिव्हरी बॉयच्या बॅगेचा वापर शस्त्रांची वाहतूक करण्यासाठी केला जात असल्याचा संशय तपास यंत्रणांनी व्यक्त केला आहे.
पिंपरी-चिंचवड गुन्हे शाखेच्या युनिट १ ला शहरात मोठ्या प्रमाणात बेकायदेशीर शस्त्रांची तस्करी होणार असल्याची गुप्त माहिती मिळाली होती. त्यानंतर पोलिसांनी सापळा रचून या चौघांना ताब्यात घेतले. आरोपींकडून मोठ्या प्रमाणात जिवंत काडतुसे आणि अतिरिक्त मॅगझिन सापडल्यामुळे ही शस्त्रे एखाद्या गंभीर गुन्ह्यासाठी, हत्येसाठी किंवा गँगवॉरसाठी वापरली जाणार होती का, याचा तपास सुरू आहे. पोलिसांकडून आरोपींची पार्श्वभूमी, शस्त्रांचा पुरवठादार आणि त्यांचे इतर गुन्हेगारी टोळ्यांशी संबंध आहेत का, याबाबत सखोल चौकशी केली जात आहे. या कारवाईमुळे शहरातील गुन्हेगारीवर नियंत्रण मिळवण्यासाठी पोलिसांनी कठोर पावले उचलल्याचे स्पष्ट झाले आहे.
