मुंबई : महाराष्ट्रातील प्रसिद्ध कीर्तनकार निवृत्ती देशमुख यांच्या मुलीच्या विवाह सोहळ्याची राज्यभरात मोठी चर्चा सुरू झाली आहे. त्यांची कन्या ज्ञानेश्वरी हिचा विवाह उद्या, ३ मे रोजी अहिल्यानगर जिल्ह्यातील संगमनेर तालुक्यातील गुंजाळवाडी शिवारात पार पडणार असून, या सोहळ्यासाठी भव्य तयारी करण्यात आली आहे. विवाहासाठी तब्बल १०० एकर परिसरात मोठा मंडप उभारण्यात आला असून लाखो लोक उपस्थित राहण्याची शक्यता व्यक्त केली जात आहे. त्यामुळे हा विवाह सोहळा राज्यातील सर्वाधिक चर्चेत असलेल्या कार्यक्रमांपैकी एक ठरणार असल्याचे बोलले जात आहे. याआधी गेल्या वर्षी पार पडलेल्या साखरपुड्याचीही मोठी चर्चा झाली होती. त्या सोहळ्याचे फोटो आणि व्हिडिओ सोशल मीडियावर मोठ्या प्रमाणात व्हायरल झाले होते.
या विवाह सोहळ्यासाठी मुख्यमंत्री, उपमुख्यमंत्री, माजी मंत्री, आमदार, खासदार तसेच विविध संत-महंतांना निमंत्रित करण्यात आले आहे. विशेष म्हणजे विवाहाच्या दिवशीच त्याच ठिकाणी गगनगिरी महाराज सप्ताहाचा ध्वजारोहण सोहळाही होणार असल्याने धार्मिक वातावरणात हा कार्यक्रम पार पडणार आहे. दरम्यान, “लग्न साधं करा” असा संदेश देणाऱ्या इंदुरीकर महाराजांनी स्वतः मुलीचा साखरपुडा शाही पद्धतीने केल्यामुळे त्यांच्यावर टीका झाली होती. या टीकेमुळे मानसिक त्रास झाल्याचे त्यांनी काही कीर्तनांमध्ये सांगितले होते. मात्र नंतर त्यांनी टीकाकारांना प्रत्युत्तर देताना “लग्न आणखी जोरात करणार” असे स्पष्टपणे सांगितले होते. राजकीय सभांवर होणाऱ्या खर्चावर कोणी प्रश्न उपस्थित करत नाही, अशी टीकाही त्यांनी केली होती. आता उद्या होणारा हा विवाह सोहळा किती भव्य स्वरूपात पार पडतो, याकडे संपूर्ण राज्याचे लक्ष लागले आहे.
