मुंबई : वीकेंड असो किंवा कामाचा थकवा, घरबसल्या आवडीचं जेवण मागवणं ही आता आपल्या जगण्याचा अविभाज्य भाग झाली आहे. कडाक्याची भूक लागल्यावर आपण पटापट मोबाईल काढतो आणि स्विगी किंवा झोमॅटोवरून ऑर्डर करतो. पण, गेल्या काही दिवसांपासून तुमचं हॉटेलचं बिल हळूहळू वाढत असल्याचं तुमच्या लक्षात आलंय का? जेवणाचे दर आणि डिलिव्हरी चार्जेस व्यतिरिक्त आता कंपन्यांनी आपली प्लॅटफॉर्म फी वाढवून ग्राहकांच्या खिशाला कात्री लावायला सुरुवात केली आहे.
फूड डिलिव्हरी क्षेत्रातील दिग्गज कंपनी ‘स्विगी’ (Swiggy) ने आता आपल्या प्रतिस्पर्धी झोमॅटोच्या पावलावर पाऊल ठेवत प्लॅटफॉर्म फीमध्ये वाढ केली आहे. यामुळे आता प्रत्येक वेळी ऑर्डर करताना तुम्हाला अधिक पैसे मोजावे लागणार आहेत. स्विगीने आता प्रति ऑर्डर प्लॅटफॉर्म फी १७.५८ रुपये (GST सह) केली आहे. यापूर्वी ही फी १४.९९ रुपये इतकी होती. विशेष म्हणजे, गेल्याच आठवड्यात ‘झोमॅटो’ने देखील आपली फी १२.५० रुपयांवरून थेट १७.५८ रुपये केली होती. प्लॅटफॉर्म फी ही एक अशी ठराविक रक्कम असते, जी तुमच्या ऑर्डरच्या किमतीवर अवलंबून नसते. तुम्ही १०० रुपयांचे जेवण मागवा किंवा १००० रुपयांचे, तुम्हाला ही फी भरावीच लागते. गेल्या वर्षी ऑगस्ट २०२५ मध्ये ही फी १२ रुपयांवरून १४ रुपये करण्यात आली होती, जी आता १७ रुपयांच्या पार गेली आहे. जेवण मागवणाऱ्या नियमित ग्राहकांसाठी ही वाढ छोटी वाटत असली, तरी महिन्याचा हिशोब केल्यास ही रक्कम मोठी ठरते. कंपन्यांच्या मते, ॲपचे मेंटेनन्स, तांत्रिक खर्च आणि डिलिव्हरी ऑपरेशन सुरळीत चालवण्यासाठी हे शुल्क वाढवणे गरजेचे आहे. मात्र, सध्या फूड डिलिव्हरी मार्केटमध्ये रॅपिडो (Rapido) सारख्या नवीन स्टार्टअप्सनी एन्ट्री केल्यामुळे स्पर्धा वाढली आहे, अशा काळात झालेली ही दरवाढ सर्वसामान्यांसाठी डोकेदुखी ठरत आहे.
