मुंबई : बेस्ट उपक्रमाने ९ मे पासून तिकीट दरात वाढ केल्यानंतर, आता १ जूनपासून बेस्ट बसमार्गांत बदल करण्याचा निर्णय घेतला आहे. भाडेवाढीनंतर बेस्टच्या प्रवाशांची संख्या काही प्रमाणात घटली आहे. बेस्ट मार्गांत बदल करताना त्यात काही नवीन मार्ग सुरू केले जातील. तसेच, ३० बस मार्गांमध्ये बदल होणार असून काही बसमार्ग खंडीत केली आहे.
बेस्ट बसमार्गांतील नवीन बदलानुसार मंत्रालय ते दादलानी पार्क, ठाणेपर्यंत आणि प्रतीक्षा नगर ते पोर्तुगीज चर्चपर्यंत नवीन बससेवा सुरू होणार आहे. मंत्रालय ते बाळकुम दादलानी पार्क ही बस पूर्व मुक्त मार्गाने ए ४९० क्रमांकाने धावणार आहे. ए १७५ ही नवीन बस प्रतीक्षा नगर, अँटॉप हिल, वडाळा चर्च, दादर, प्लाझा, शिवाजी पार्क, पोतुगीज चर्च, कबुतर खाना, प्लाझा मार्गे वर्तुळाकार धावणार आहे. बॅकबे आगार ते राणी लक्ष्मीबाई चौकपर्यंत धावणारी ए सी १० ही बस आता पी. डिमेलो मार्गे न जाता म्युझियम, हुतात्मा चौक, छत्रपती शिवाजी महाराज टर्मिनस, महात्मा फुले मंडई, मेट्रो, काळबादेवी, भुलेश्वर, जे. जे. रुग्णालय, माझगावमार्गे डॉकयार्ड रोड मार्गे शीव येथे जाईल.
नेव्ही नगर ते वांद्रे वसाहतपर्यंत धावणारी ११ मर्यादित ही बस भारतमाता उड्डाणपूल मार्गे धावणार असल्याने लालबाग, जयहिंद व जिजामाता उद्यान हे थांबे नसतील. बस क्र. २१२ ही वांद्रे रेक्लमेशन बस स्थानकाहून शिवडीकडे जाताना हिंदमाता मार्गे न जाता शारदा सिनेमा, भोईवाडा मार्गे जाणार आहे. शिवाजी नगर आगारहून दिंडोशीकडे जाताना बस क्र. ए ४८८ यापुढे कमानी बैल बाजार मार्गे न जाता असल्फा मार्गे जाईल. जोगेश्वरी पुलावरून जाणारी ए १८० ही बस गोखले पुलावरून धावेल. मंत्रालय ते वरळीपर्यंत धावणारी ए ८९ बस यापुढे रविवारी धावणार नाही. वरळी आगार ते कुलाबा बसस्थानकापर्यंत धावणारी ए १२४ बस मंत्रालय ते वरळी आगार दरम्यान धावणारी ए८९ बस आता रविवारी धावणार नाही. तर वरळी आगार ते कुलाबा बस स्थानक दरम्यान धावणारी ए १२४ बस आता संपूर्ण आठवडा धावेल.
