पुणे : निवडणुकीच्या काळात राजकीय पक्ष तसेच उमेदवारांकडून गुंडाचा वापर केला जात असल्याचा आरोप होत असतानाच पुण्यात आचारसंहिता लागू झाल्यापासून जवळपास ४० तडीपार गुंडांना पुणे पोलिसांनी पकडले आहे. त्यात पुण्यात ऐन निवडणुकीच्या काळात अन् प्रचाराच्या धामधुमीत हे तडीपार गुंड शहरात हजेरी लावत असल्याचे चित्र आहे. त्यामुळे या आरोपींमध्ये तथ्य असल्याचे दिसते. राज्यभरात विधानसभा निवडणुकीची धामधूम सुरू आहे. प्रचार शिगेला पोहचला आहे. आरोपी-प्रत्यारोप होत आहेत. हे सुरू असतानाच राजकीय पक्ष तसेच उमेदवार गुंडांचा वापर करत असल्याचाही आरोप होत आहे. दरम्यान निवडणूकीत शहरात कायदा सुव्यवस्था राखण्यासाठी पुणे पोलिसांकडून सतर्कता बाळगत काम केले जात आहे. त्यामध्ये बेकायदा हत्यारे बाळगणाऱ्या गुंडांसह तडीपार गुंडावर नजर ठेवली जात असून, त्यांना चाप लावण्यात येत आहे. राज्यात १५ ऑक्टोबर रोजी आचारसंहिता लागू झाली. तेव्हापासून पुणे पोलीस या गुन्हेगारांविरोधात कडक पावले उचलत आहेत.
यादरम्यान, १५ ऑक्टोंबर ते १३ नोव्हेंबर या कालावधीत एकूण ४० तडीपार गुंडांना अटक करण्यात आली आहे. यामध्ये काही गुंडांकडे बेकायदा हत्यारे देखील सापडली आहेत. चालू वर्षात जानेवारी ते सप्टेंबर या कालावधीत संपूर्ण शहरात २१४ तडीपार गुंडांना अटक करण्यात आली आहे. त्यानुसार आतापर्यंत दर महिन्याला सरासरी वीस तडीपार गुन्हेगार शहरात आढळून आले होते. मात्र गेल्या महिन्याभरात ही संख्या दुपटीने वाढल्याचे दिसते. अचानक निवडणूकीच्या काळातच हे गुंड शहरात हजेरी लावत असल्याने वेगळीच चर्चा सुरू झाली आहे. त्यामुळेच निवडणुकीच्या काळात राजकीय पक्ष आणि उमेदवारांकडून गुन्हेगारांचा वापर केला जात असल्याचा आरोप प्रत्यारोपाला तथ्य असल्याची शंका येते. पुणे शहरातील अवैध धंदे बंद करण्याचे आदेश दिलेले असताना धनकवडी भागात सुरू असलेल्या जुगार अड्ड्यावर गुन्हे शाखेने छापा टाकून पर्दाफाश केला आहे. पोलिसांनी येथून तब्बल दहा जणांना पकडले असून, त्याच्याविरुद्ध गुन्हा दाखल केला. तर, २२ हजार रुपयांची रोकड व मोबाइल जप्त केले आहे. हद्दीत एवढ्या मोठ्या प्रमाणावर जुगार अड्डा सुरू असताना सहकारनगर पोलिसांचा त्याकडे कानाडोळा असल्याचे दिसून येत आहे.
आचारसंहिता काळातील कारवाई
परिमंडळ एक – ३
परिमंडळ दोन – ८
परिमंडळ तीन – ९
परिमंडळ चार – ४
परिमंडळ पाच – १६
