डोंबिवली : शेअर्समध्ये ऑनलाईन व्यवहारातून गुंतवणूक केल्यास आपणास आकर्षक परतावा मिळेल अशी माहिती भामट्यांनी डोंबिवली, उल्हासनगरमधील तीन महिलांना दिली. या महिलांकडून टप्प्याने ३२ ते ४३ लाख रूपयांच्या रकमा उकळल्यानंतर भामट्यांनी या महिलांना आकर्षक परतावा नाहीच पण त्यांच्या मूळ रकमा परत न करता त्यांची एकूण एक कोटीची फसवणूक केली आहे. गेल्या चार महिन्याच्या कालावधीत डोंबिवली, उल्हासनगरमध्ये या घटना घडल्या आहेत. विठ्ठलवाडी, डोंबिवलीतील टिळकनगर, मानपाडा पोलीस ठाण्यात याप्रकरणी माहिती आणि तंत्रज्ञान कायद्याने गुन्हे दाखल करण्यात आले आहेत.
डोंबिवलीतील ३० वर्षाच्या एका महिलेला एप्रिलमध्ये एका भामट्याने इन्स्टाग्रामवरून संपर्क केला. या महिलेशी ओळख वाढवून या महिलेला शेअर व्यवहाराच्या माध्यमातून आकर्षक परतावा देण्याचे आमिष दाखविले. एप्रिल ते जुलै या कालावधीत या महिलेने ३२ लाख ७६ हजार रूपये या भामट्याच्या सूचनेवरून टप्प्याने गुंतवले. चार महिने झाल्यानंतर या महिलेने वाढीव परतावा देण्याची मागणी भामट्याकडे सुरू केली. त्यावेळी त्याने उडवाउडवीची उत्तरे देण्यास सुरूवात केली. आकर्षक परतावा नाहीच, पण मूळ रक्कमही भामट्याने लाटल्याने या महिलेने मानपाडा पोलीस ठाण्यात तक्रार केली.
