गोरेगाव : मुंबईच्या गोरेगावमधून एक धक्कादायक घटना समोर येत आहे. दारूसाठी पैसे न दिल्याच्या रागातून पतीने आपल्याच पत्नीची गळा आवळून हत्या केल्याची घटना घडली आहे. यामुळे परिसरात खळबळ उडाली आहे. पोलिसांनी आरोपी पतीला अटक केली असून मृत महिलेचे नाव गौसिया वासिम शेख (वय अंदाजे ३५) आहे. ही घटना गोरेगावच्या भगतसिंग नगर परिसरात घडली आहे.
गौसिया वसीम शेख आणि तिचा पती वासिम रफीक शेख यांच्यात सोमवारी रात्री वाद झाला होता. वासिमने गौसियाकडे दारू खरेदी करण्यासाठी पैसे मागितले. मात्र तिने पैसे देण्यास नकार दिला. याच कारणावरून दोघांमध्ये पहिले शाब्दिक वाद झाला आणि हळूहळू वाद विकोपाला गेला. रागाच्या भरात वासिमने गौसियाचा गळा आवळला, ज्यामुळे ती जागीच बेशुद्ध पडली. यानंतर गौसिया वासिम शेख हिला तात्काळ गोरेगाव येथील ट्रामा केअर रुग्णालयात नेण्यात आले,मात्र डॉक्टरांनी तिला उपचारापूर्वीच मृत घोषित केले. घटनेची माहिती मिळताच बांगूरनगर पोलिसांनी घटनास्थळी धाव घेतली आणि तपास सुरु केला. पोलिसांनी हत्येचा गुन्हा नोंदवून आरोपी वसीम रफीक शेख याला अटक केली आहे. या घटनेचा अधिक तपास बांगूरनगर पोलीस ठाण्याचे अधिकारी करत आहेत.
