वृत्तसंस्था : पुढील वर्षी जानेवारीमध्ये भारतात होणाऱ्या इंटरनॅशनल मास्टर्स क्रिकेट वर्ल्ड कप स्पर्धेत सहभागी होण्यास पाकिस्तान क्रिकेट बोर्डाने (पीसीबी) आपल्या ५० वर्षांवरील (50s) संघाला परवानगी नाकारली आहे. त्यामुळे पाकिस्तानच्या वेटरन्स संघाने स्पर्धेतून माघार घेतली असून, गतवर्षी श्रीलंकेत झालेल्या स्पर्धेतील विजेत्या संघाला यंदा खेळता येणार नाही. आयोजक आणि यजमान भारताने वेळेत व्हिसा तसेच उच्चस्तरीय सुरक्षेची हमी दिली होती. मात्र, पीसीबीकडून परवानगी न मिळाल्याने संघाला माघार घ्यावी लागल्याची माहिती पाकिस्तान वेटरन्स क्रिकेट असोसिएशनचे प्रमुख फवाद एजाज यांनी दिली. त्यांनी सांगितले की, पर्यायी संघाची व्यवस्था करता यावी म्हणून आयोजकांना हा निर्णय आधीच कळविण्यात आला होता.
फवाद एजाज यांच्या म्हणण्यानुसार, पाकिस्तानचे गृहमंत्री आणि पीसीबीचे अध्यक्ष मोहसिन नक्वी यांनी भारतात खेळण्यास मंजुरी दिली जाणार नसल्याचे स्पष्ट केले होते. त्यामुळे बोर्ड आणि संबंधित मंत्रालयाकडून परवानगी न मिळाल्याने संघ स्पर्धेबाहेर राहिला. भारतात खेळण्यास पाकिस्तानने नकार देण्याची ही पहिलीच वेळ नसून, यापूर्वी पाकिस्तान हॉकी महासंघानेही आशियाई चॅम्पियन्स ट्रॉफीसाठी भारतात येण्यास नकार दिला होता आणि त्याऐवजी बांग्लादेश संघाचा समावेश करण्यात आला होता. भारत-पाकिस्तानमधील दीर्घकालीन राजकीय तणावामुळे दोन्ही देशांदरम्यान द्विपक्षीय मालिका होत नसून, दोन्ही संघ केवळ आयसीसी आणि आशियाई स्पर्धांमध्येच आमनेसामने येतात.
