मुंबई : अशोक सराफ आणि संकर्षण कऱ्हाडे यांच्या प्रमुख भूमिका असलेला ‘आदि अनंत’ हा मराठी चित्रपट १२ नोव्हेंबर रोजी प्रदर्शित होणार असून, चित्रपटाचा ट्रेलर नुकताच प्रदर्शित करण्यात आला आहे. कधी हट्ट, कधी मिश्किल संवाद, तर कधी भावनिक क्षण अशा विविध रंगांनी सजलेले आजोबा-नातवाचे नाते या चित्रपटातून उलगडणार आहे. ट्रेलरच्या अनावरणाचा विशेष सोहळा चित्रपटाच्या टीमच्या कुटुंबीयांच्या हस्ते पार पडला. दोन पिढ्यांमधील विचारांचे मतभेद, नात्यातील जिव्हाळा, विनोद आणि भावनिक चढ-उतार यांची सुंदर मांडणी ट्रेलरमध्ये पाहायला मिळते. ट्रेलरच्या शेवटी अभिनेता रितेश देशमुखच्या आवाजातील, “तुमची माणसं सोबत घेऊन तुम्ही कमी यशस्वी असलात तरी चालेल; पण आपली माणसं तोडून यशाच्या शिखरावर पोहोचलात, तरी तुम्ही फेलच आहात,” हा संवाद विशेष लक्ष वेधून घेत आहे.
दिग्दर्शक महेश लिमये यांनी आजोबा-नातवाच्या नात्यातील सहजता, छोट्या-छोट्या प्रसंगांमधील भावनिकता आणि कौटुंबिक जिव्हाळा प्रामाणिकपणे मांडण्याचा प्रयत्न केल्याचे सांगितले. निर्माते समीर हम्पी आणि अनिकेत मराठे यांच्या मते, धावपळीच्या जीवनात कुटुंबासोबतचे क्षण किती महत्त्वाचे असतात, हा संदेश चित्रपटातून दिला जाणार आहे. महेश लिमये दिग्दर्शित या चित्रपटाची कथा, पटकथा आणि संवाद संकर्षण कऱ्हाडे यांनी लिहिले आहेत. चित्रपटात अशोक सराफ, संकर्षण कऱ्हाडे, सखी गोखले, वैदेही परशुरामी, योगेश शिरसाट, कविता लाड, आरव अहीर, श्रीरंग गोडबोले आणि गुरु ठाकूर यांच्या प्रमुख भूमिका असून, संपूर्ण कुटुंबाने एकत्र पाहावा असा हा चित्रपट १२ नोव्हेंबरपासून चित्रपटगृहांत प्रदर्शित होणार आहे.