मुंबई : मुंबईतील ऐतिहासिक हाफकीन जैव-औषध निर्माण संस्थेचे पुनरुज्जीवन करण्यासाठी राज्य सरकारने महत्त्वाचे पाऊल उचलण्याची घोषणा केली आहे. अन्न व औषध प्रशासन आयुक्त तुकाराम मुंढे यांच्याकडे हाफकीन संस्थेचा अतिरिक्त कार्यभार सोपविण्यात येणार असल्याची माहिती अन्न व औषध प्रशासन मंत्री नरहरी झिरवाळ यांनी विधानसभेत दिली. तसेच हाफकीन संस्थेची जागा विकली जाणार नाही किंवा संस्थेचे खासगीकरण केले जाणार नाही, अशी स्पष्ट ग्वाहीही त्यांनी सभागृहात दिली.
मुंबईतील हाफकीन संस्थेच्या आर्थिक स्थितीबाबत आमदार ज्योती गायकवाड, विजय वडेट्टीवार, अमिन पटेल, योगेश सागर, अजय चौधरी, रईस शेख, अस्लम शेख, विश्वजीत कदम, विकास ठाकरे, प्रशांत ठाकूर, महेश जामसुतकर, सुनील राऊत आणि अतुल भातखळकर यांनी प्रश्न उपस्थित केले होते. त्याला उत्तर देताना मंत्री झिरवाळ यांनी हाफकीन संस्थेचे पुनरुज्जीवन करण्यासाठी शासन कटिबद्ध असल्याचे स्पष्ट केले. विविध प्रकारच्या लसींच्या निर्मितीसाठी एकेकाळी देशभरात नावाजलेली ही संस्था सध्या आर्थिक अडचणींचा सामना करत असून तिचे अस्तित्व टिकविण्यासाठी आवश्यक ती सर्व पावले उचलली जातील, असे त्यांनी सांगितले. हाफकीन संस्थेच्या भवितव्याबाबत नेमण्यात आलेल्या डॉ. रघुनाथ माशेलकर समितीचा अहवालही लवकरच सभागृहात सादर करण्यात येईल, अशी माहिती त्यांनी दिली. यावेळी झालेल्या चर्चेदरम्यान अनेक सदस्यांनी हाफकीन संस्थेच्या खासगीकरणाच्या शक्यतेबाबत चिंता व्यक्त केली. काही सदस्यांनी संस्थेतील औषधनिर्मितीची सूत्रे इतर कंपन्यांकडे गेल्याचा तसेच संस्थेत मोठ्या प्रमाणात गैरव्यवहार झाल्याचा आरोप करत संपूर्ण प्रकरणाची सखोल चौकशी करण्याची मागणी केली. सभागृहातील सत्ताधारी आणि विरोधी पक्षातील सदस्यांनी संस्थेचे पुनरुज्जीवन करण्यासाठी धडाडीचे सनदी अधिकारी तुकाराम मुंडे यांची नियुक्ती करण्याची मागणी केली. यावर विधानसभा अध्यक्ष राहुल नार्वेकर यांनी कोणत्या संस्थेवर कोणत्या अधिकाऱ्याची नियुक्ती करायची हा निर्णय सरकारचा अधिकार असल्याचे स्पष्ट करत सदस्यांनी अशा स्वरूपाच्या सूचना देऊ नयेत, असे निर्देश दिले. त्यानंतर मंत्री नरहरी झिरवाळ यांनी हाफकीन संस्थेचा अतिरिक्त कार्यभार तुकाराम मुंडे यांच्याकडे सोपविण्यात येईल आणि त्यांच्या नेतृत्वाखाली संस्थेला पुन्हा पूर्ववैभव प्राप्त करून देण्यासाठी प्रयत्न केले जातील, अशी ग्वाही सभागृहात दिली. शासनाच्या या घोषणेमुळे हाफकीन संस्थेच्या भवितव्याबाबत निर्माण झालेल्या अनेक शंकांना पूर्णविराम मिळण्याची अपेक्षा व्यक्त केली जात आहे.
