मुंबई : मुंबईतील कोट्यवधी भाविकांचे श्रद्धास्थान असलेल्या प्रभादेवी येथील सिद्धीविनायक मंदिरामधून एक खळबळजनक घटना समोर आली आहे. मंदिराच्या सुरक्षेसाठी आणि व्यवस्थापनासाठी नेमलेल्या एका कर्मचाऱ्यानेच चक्क दानपेटीतील पैशांवर डल्ला मारला आहे. ही संपूर्ण चोरीची घटना सीसीटीव्ही कॅमेऱ्यात कैद झाली असून, यामुळे मंदिर परिसरात मोठी खळबळ उडाली आहे.
मंदिराच्या पुजारी कक्षातील दानपेटीतून पैसे कमी होत असल्याचे प्रशासनाच्या लक्षात आले होते. एका महिला पदाधिकाऱ्याने सीसीटीव्ही फुटेज तपासले असता, त्यांना एक कर्मचारी संशयास्पदरीत्या दानपेटीजवळ हालचाली करताना दिसला. त्यानंतर प्रशासनाने मागील ८ ते १० दिवसांचे फुटेज तपासले, तेव्हा धक्कादायक वास्तव समोर आले. हा कर्मचारी अतिशय सराईतपणे आपल्या बोटांची ‘कैची’ करून दानपेटीतून पैसे बाहेर काढत असल्याचे स्पष्ट झाले. याप्रकरणी मंदिर प्रशासनाने तत्काळ दादर पोलिसात तक्रार दाखल केली. पोलिसांनी मुख्य आरोपी कर्मचाऱ्याला बेड्या ठोकल्या असून त्याला न्यायालयाने 3 दिवसांची पोलीस कोठडी सुनावली आहे. प्राथमिक तपासात आरोपीने आपला गुन्हा मान्य केला असून, त्याने आतापर्यंत सुमारे १० हजार रुपयांची चोरी केल्याचे समोर आले आहे. या चोरीच्या घटनेत केवळ एकच व्यक्ती नसून आणखी ५ ते ६ जणांचा सहभाग असल्याचा संशय पोलिसांना आहे. हा प्रकार गेल्या अनेक दिवसांपासून सुरू होता का? या चोरीत इतर कर्मचाऱ्यांचे संगनमत होते का? आतापर्यंत नेमकी किती रकमेची चोरी झाली आहे? या सर्व प्रश्नांची उत्तरे शोधण्यासाठी दादर पोलीस सध्या कसून तपास करत आहेत. भाविकांनी श्रद्धेने अर्पण केलेल्या पैशांची अशा प्रकारे चोरी झाल्यामुळे संताप व्यक्त केला जात आहे. मंदिर प्रशासनाने आता सुरक्षा आणि देखरेख अधिक कडक करण्याचा निर्णय घेतला आहे.
