मुंबई : पोस्टातून निवृत्त झालेल्या विलेपार्ले येथील एका दाम्पत्याने आपल्या मुलाला परदेशात शिकवले आणि कमर्शियल पायलटचा अभ्यासक्रम पूर्ण केला. त्याला वैमानिक बनवायचे त्यांचे स्वप्न होते. भारतामध्ये परतल्यानंतर त्याला चांगल्या विमान कंपनीत वैमानिक म्हणून नोकरी मिळवून देण्यासाठी एका भामट्याने २१ लाख रुपये खर्च सांगितला आणि टप्प्याटप्प्याने १८ लाख रुपये घेतले. प्रत्यक्षात मात्र नोकरी न लावल्याने त्यांचे हे स्वप्न अधुरे राहिलेच. त्याचबरोबर १८ लाख रुपयेही गेले. याप्रकरणी विलेपार्ले पोलिस ठाण्यात गुन्हा दाखल करण्यात आला आहे.
विलेपार्ले पूर्व येथे हे दाम्पत्य राहते. मुलाचे बी.एस.सी पदवीचे शिक्षण पूर्ण झाल्यानंतर त्याला अमेरिकेत कमर्शियल पायलटच्या अभ्यासक्रमासाठी पाठवले. हा अभ्यासक्रम पूर्ण करून मुलगा भारतामध्ये परतला. यानंतर वैमानिक होण्यासाठी भारतामधील कोणत्याही एअरलाइन्स कंपनीत एक विशिष्ट कोर्स करणे बंधनकारक आहे. त्यामुळे वृद्ध दाम्पत्याने भारतीय विमान कंपन्यांमध्ये मुलासाठी प्रयत्न करण्यास सुरुवात केली. यातच परिचयातील एका व्यक्तीने सुरक्षा एजन्सी चालविणाऱ्या हेनरी पॉल नावाच्या व्यक्तीशी त्यांची ओळख करून दिली. हेनरी याने अनेक बड्या कंपन्यांच्या अधिकाऱ्यांशी आपली ओळख असल्याचे त्यांना सांगितले. तो कोर्स आणि वैमानिकाची नोकरी लावण्यासाठी २१ लाख रुपये खर्च येईल, असे सांगितले. मुलाचे आणि स्वतःचे स्वप्न पूर्ण झालेले पाहण्यासाठी इतके पैसे खर्च करण्याची तयारी निवृत्त दाम्पत्याने दाखवली.
हेनरी आणि त्याच्या कार्यालयात काम करणाऱ्या एका महिलेने दाम्पत्याचा विश्वास संपादन करून त्यांना जेट एअरवेजमध्ये नोकरी लावण्याचे प्रलोभन दाखविले. त्यांच्या मागणीनुसार या दाम्पत्याने थोडेथोडे करून १८ लाख रुपये दिले. पैसे देऊन बरेच दिवस झाले तरी नोकरीबाबत काहीच हालचाल केली जात नसल्याचे लक्षात येताच दाम्पत्याने हेनरीकडे विचारणा केली. त्याने जेट एअरवेज बंद झाल्याचे सांगून अन्य कंपनीत काम करू देतो असे भासविले. काही दिवस थातुरमातुर कारणे देऊन हेनरी त्याचे कार्यलय बंद करून पसार झाला. फसवणूक झाल्याचे लक्षात येताच या दाम्पत्याने विलेपार्ले पोलिस ठाण्यात तक्रार केली.
