ठाणे : सार्वजनिक वाहतूक व्यवस्थेला अधिक सक्षम आणि प्रवाशांसाठी सुरक्षित व सुसज्ज बनवण्याच्या उद्देशाने ठाणे जिल्ह्यात आधुनिक ‘प्रवासी निवारे’ उभारण्यास शासनाने प्रशासकीय व आर्थिक मान्यता दिली आहे. याबाबत नुकताच शासन निर्णय जाहीर करण्यात आला आहे. महाराष्ट्र राज्य मार्ग परिवहन महामंडळाच्या मुंबई विभागाअंतर्गत राबविण्यात येणाऱ्या या योजनेमुळे एसटीने दररोज प्रवास करणाऱ्या जिल्ह्यातील हजारो नागरिकांना मोठा दिलासा मिळणार आहे. ठाणे, मानपाडा, भिवंडी, शहापूर, मुरबाड यांसारख्या महत्वाच्या एसटीच्या मार्गावर हे अत्याधुनिक प्रवासी निवारे उभारण्यात येणार आहे.
ठाणे जिल्हा हा मुंबई महानगर प्रदेशातील एक महत्त्वाचा आणि वेगाने विकसित होणारा भाग असल्यामुळे येथील सार्वजनिक वाहतूक व्यवस्थेवर मोठ्या प्रमाणात ताण आहे. जिल्ह्यातील शहरी तसेच ग्रामीण भागांना जोडणारे महाराष्ट्र राज्य मार्ग परिवहन महामंडळाचे (एसटी) विस्तृत जाळे कार्यरत असून, दररोज हजारो प्रवासी या सेवेचा नियमित वापर करतात. ठाणे, कल्याण-डोंबिवली, भिवंडी, शहापूर, मुरबाड यांसारख्या भागांतून जिल्ह्याच्या विविध कोपऱ्यांत तसेच राज्यातील इतर जिल्ह्यांकडे एसटी बससेवा मोठ्या प्रमाणावर धावते. याशिवाय, नाशिक, पुणे, पालघर, रायगड आदी जिल्ह्यांतूनही मोठ्या संख्येने एसटी बस ठाणे जिल्ह्यात ये-जा करत असतात, त्यामुळे बसस्थानकांवर आणि प्रमुख थांब्यांवर प्रवाशांची सतत वर्दळ असते. अशा परिस्थितीत प्रवाशांना सुरक्षित, स्वच्छ आणि सुसज्ज थांबा मिळणे अत्यंत आवश्यक ठरते. अनेक ठिकाणी सध्या प्रवासी उभे राहण्यासाठी पुरेशी व्यवस्था नसल्यामुळे उन्हाळा, पावसाळा किंवा इतर प्रतिकूल हवामानात प्रवाशांना मोठ्या अडचणींना सामोरे जावे लागते. विशेषतः महिला, ज्येष्ठ नागरिक, विद्यार्थी आणि लांब पल्ल्याच्या प्रवासासाठी थांबणाऱ्या प्रवाशांसाठी ही समस्या अधिक तीव्र होते. त्यामुळे आधुनिक सुविधांनी सुसज्ज ‘प्रवासी निवारे’ उभारण्याचा शासनाचा निर्णय अत्यंत महत्त्वपूर्ण ठरत आहे. प्रत्येक प्रवासी निवाऱ्यासाठी सुमारे २० लाख रुपये खर्च अपेक्षित असून, या कामांमध्ये निवाऱ्याची बांधणी, पायाभूत सुविधा, वीज व पाणीपुरवठा, तसेच पूरक विकासकामांचा समावेश आहे. तर या प्रवासी निवाऱ्यांचे काम सुरू करण्यापूर्वी वास्तुशास्त्रीय व तांत्रिक मान्यता घेणे, पर्यावरणीय नियमांचे पालन करणे तसेच सविस्तर अंदाजपत्रकानुसार कामे राबविणे बंधनकारक करण्यात आले आहे.
