ठाणे : सायबर गुन्हेगारांनी रिवार्ड पॉइंट्स रीडीम करून देण्याच्या नावाखाली एका ज्येष्ठ नागरिकाला ऑनलाइन गंडा घातल्याचा प्रकार ठाण्यात समोर आला आहे. पाच हजार ६९९ रुपयांच्या रिवार्ड पॉइंट्ससाठी एका ज्येष्ठ नागरिकाने तीन लाख ५० हजार रुपये गमावले. या प्रकरणी चितळसर पोलिस ठाण्यात गुन्हा दाखल झाला आहे. ठाण्यातील लोकपूरम परिसरात वास्तव्यास असलेले ७३ वर्षांचे ज्येष्ठ नागरिक एका नामांकित औषध कंपनीमध्ये उच्च पदावर काम करत होते. तेरा वर्षांपूर्वी ते निवृत्त झाले. गेल्या आठवड्यात १८ तारखेला रात्री त्यांना मोबाइलवर मेसेज आला. ‘५ हजार ६९९ रुपयांचे बँकेचे कार्ड रिवार्ड पॉइंट्स आज कालबाह्य होणार असून तुमचे पॉइंट खात्यामध्ये रिडीम करण्यासाठी लिंकवर क्लिक करा,’ असा हा मेसेज होता. या मेसेजमध्ये लिंकही देण्यात आली होती. ज्येष्ठाने रिवार्ड पॉइंट्स क्रेडिट कार्डमध्ये रिडीम करण्यासाठी मेसेजमधील लिंकवर क्लिक केले. त्यानंतर एक अर्ज उघडण्यात आला. या ज्येष्ठाने क्रेडिट कार्डची माहिती भरत अर्ज सादर केला. तितक्यात ज्येष्ठाच्या मोबाइलवर दोन ओटीपी आले. तसेच, दोन लाख आणि एक लाख ५० हजार असे एकूण तीन लाख ५० हजार रुपये काढले गेल्याचे मेसेज त्यांना आले.
आपली आर्थिक फसवणूक झाल्याचे ज्येष्ठाच्या लक्षात आल्यानंतर त्यांनी तत्काळ बँकेला संपर्क साधून, क्रेडिट कार्ड ब्लॉक केले. नंतर त्यांनी बँकेत जाऊन याबाबतची माहिती दिली. तसेच, सायबर पोर्टलसह पोलिस ठाण्यातही तक्रार केली.