मुंबई : ग्राहकांना अधिक चांगल्या आणि जलद सेवा देण्याच्या उद्देशाने भारतीय टपाल विभागाने प्रीमियम २४ स्पीड पोस्ट सेवेचा विस्तार करण्याचा निर्णय घेतला आहे. महाराष्ट्र सर्कलने सध्याच्या मेट्रो-टू-मेट्रो नेटवर्कच्या पलीकडे या सेवेची व्याप्ती वाढवण्याची घोषणा केली असून, एकूण २७ नवीन मार्गिका कार्यान्वित करण्यात येणार आहेत. यामध्ये कागदपत्रांसाठी २५, तर पार्सल सेवेसाठी दोन मार्गिकांचा समावेश आहे. मुंबई, ठाणे, नवी मुंबई, पुणे, नाशिक आणि नागपूर येथील किरकोळ तसेच घाऊक ग्राहकांना जलद आणि वेळेत वितरणाची सुविधा उपलब्ध करून देणे, हा या विस्तारामागील प्रमुख उद्देश आहे. सध्या २४ स्पीड पोस्ट सेवा दिल्ली, मुंबई, बेंगळुरू, चेन्नई, हैदराबाद आणि कोलकाता या सहा प्रमुख शहरांना जोडते.
मुंबईतील २९ नियुक्त टपाल कार्यालयांमध्ये इतर मेट्रो शहरांसाठी २४ स्पीड पोस्टचे बुकिंग स्वीकारले जाते, तर या सेवेद्वारे येणाऱ्या टपालाचे संपूर्ण शहरात वितरण केले जाते. नव्या मार्गिकांमुळे अधिक वितरण पिन कोडपर्यंत जलद सेवा पोहोचवता येणार आहे. नवीन मार्गिकांमध्ये मुंबईहून बाहेर जाणाऱ्या सहा मार्गिकांचा समावेश आहे. यांद्वारे मुंबईला एनसीआर, ठाणे व नवी मुंबई, नाशिक, पुणे, नागपूर आणि अहमदाबादशी जोडले जाणार आहे. प्रत्येक मार्गिकेसाठी २८ नियुक्त टपाल कार्यालयांमध्ये बुकिंगची सुविधा असेल. ठाणे आणि नवी मुंबईतून बाहेर जाणाऱ्या १० मार्गिकांद्वारे या शहरांना मुंबई, चेन्नई, कोलकाता, हैदराबाद, बेंगळुरू, दिल्ली, नाशिक, पुणे, नागपूर आणि अहमदाबादशी जोडण्यात येणार आहे. या मार्गिकांसाठी प्रत्येकी १२ नियुक्त टपाल कार्यालयांमध्ये बुकिंग स्वीकारले जाईल. याशिवाय, बाहेरून येणाऱ्या नऊ मार्गिकांमध्ये एनसीआर ते मुंबई, अहमदाबाद ते मुंबई, दिल्ली, चेन्नई, कोलकाता, हैदराबाद, बेंगळुरू, अहमदाबाद ते ठाणे व नवी मुंबई आणि चेन्नई ते पुणे या मार्गांचा समावेश आहे. मुंबई-पुणे आणि मुंबई-अहमदाबाद या दोन नवीन पार्सल मार्गिका सुरू करण्यात आल्या आहेत. या मार्गिकांसाठी मुंबईतील २९ टपाल कार्यालयांमध्ये बुकिंग स्वीकारले जाईल. तसेच, पुण्यातील ३८ आणि अहमदाबादमधील पाच वितरण कार्यालयांद्वारे पार्सल वितरणाची सुविधा सुलभ होणार आहे. या दोन्ही मार्गिकांवर कागदपत्रांचे वितरणही केले जाणार आहे. किरकोळ आणि घाऊक ग्राहकांना नियुक्त बुकिंग कार्यालयांमधून २४ स्पीड पोस्ट सेवेचा लाभ घेता येईल. त्यामुळे ग्राहकांनी जवळच्या टपाल कार्यालयात या सेवेची उपलब्धता तपासून तिचा लाभ घ्यावा.
प्रमुख टपाल कार्यालये आणि सुविधा :
- प्रमुख बुकिंग केंद्रे : विलेपार्ले बिझनेस पोस्ट सेंटर, वाशी, दादर, मुंबई जीपीओ आणि जेकब सर्कल पोस्ट ऑफिस.
- प्रमुख वितरण कार्यालये : कांदिवली पश्चिम, मालाड पूर्व, कांदिवली पूर्व, साकीनाका टपाल कार्यालय आणि आझादनगर टपाल कार्यालय.
