मुंबई : बॉलिवूड अभिनेता सलमान खान यांनी झोपडपट्टी पुनर्वसन प्राधिकरण (एसआरए), मुंबईच्या कार्यालयाला सदिच्छा भेट देत संस्थेच्या विविध उपक्रमांची माहिती घेतली. या भेटीदरम्यान त्यांनी एसआरएच्या कामकाजाची पाहणी केली तसेच झोपडपट्टी पुनर्वसनासाठी राबविण्यात येणाऱ्या योजनांचा आढावा घेतला. यावेळी सलमान खान यांच्या हस्ते एसआरएच्या अत्याधुनिक आयटी सर्व्हर रूमचे उद्घाटन करण्यात आले. एसआरएच्या प्रशासनात डिजिटल तंत्रज्ञानाचा अधिक प्रभावी वापर करण्याच्या उद्देशाने ही सर्व्हर रूम उभारण्यात आली असून, विविध पुनर्वसन प्रकल्पांची माहिती, महत्त्वाची कागदपत्रे आणि अन्य डिजिटल माहिती सुरक्षित ठेवणे तसेच त्यांचे व्यवस्थापन अधिक कार्यक्षम पद्धतीने करणे आता शक्य होणार आहे. या उपक्रमामुळे एसआरएच्या ई-गव्हर्नन्स प्रणालीला अधिक बळ मिळणार असून, नागरिकांना सेवा अधिक जलद, पारदर्शक आणि सुलभ पद्धतीने उपलब्ध करून देण्यास मदत होणार आहे. याच कार्यक्रमात सलमान खान यांच्या हस्ते एसआरएच्या कॉफी टेबल बुकचेही अनावरण करण्यात आले. या पुस्तकामध्ये एसआरएचा प्रवास, झोपडपट्टी पुनर्वसन क्षेत्रातील महत्त्वाचे प्रकल्प, यशस्वी पुनर्वसनाच्या कथा, विकासकामे आणि संस्थेच्या कार्याची सविस्तर माहिती देण्यात आली आहे. या कार्यक्रमाला एसआरएचे मुख्य कार्यकारी अधिकारी डॉ. महेंद्र कल्याणकर यांच्यासह अनेक अधिकारी आणि लाभार्थी उपस्थित होते.
कार्यक्रमादरम्यान सलमान खान यांनी ५० हून अधिक पात्र झोपडपट्टीधारकांना त्यांच्या हक्काच्या घरांच्या चाव्यांचे वितरण केले. अनेक वर्षांपासून पुनर्वसनाची प्रतीक्षा करणाऱ्या लाभार्थ्यांसाठी हा भावनिक आणि आनंदाचा क्षण ठरला. घराच्या चाव्या स्वीकारल्यानंतर लाभार्थ्यांनी शासन आणि एसआरए प्रशासनाबद्दल कृतज्ञता व्यक्त केली. मुंबईतील झोपडपट्टीधारकांना सुरक्षित, कायमस्वरूपी आणि सन्मानाचे घर उपलब्ध करून देण्यासाठी एसआरएकडून विविध पुनर्वसन प्रकल्प राबविले जात असून, या प्रक्रियेत तंत्रज्ञानाचा वापर वाढविण्यावर विशेष भर दिला जात आहे. प्रशासनातील पारदर्शकता वाढविणे, नागरिकांना वेळेत सेवा उपलब्ध करून देणे आणि पुनर्वसन प्रक्रिया अधिक कार्यक्षम बनविणे हे एसआरएचे प्रमुख उद्दिष्ट असल्याचे यावेळी अधिकाऱ्यांनी सांगितले. सलमान खान यांच्या भेटीमुळे एसआरएच्या डिजिटल उपक्रमांबाबत आणि पुनर्वसनाच्या कामांबाबत व्यापक चर्चा झाली. दरम्यान, सलमान खान यांच्या चित्रपट कारकिर्दीबाबतही चाहत्यांमध्ये उत्सुकता असून, ते आगामी काळात ‘टायगर वर्सेस पठाण’ आणि ‘दबंग ४’ या चित्रपटांमध्ये झळकणार असल्याची चर्चा आहे.
