पुणे : पुणेकरांसह देश-विदेशातून येणाऱ्या पर्यटकांसाठी पुणे महानगर परिवहन महामंडळाने (पीएमपी) एक आकर्षक पर्यटन सेवा सुरू केली आहे. लोकप्रिय ‘पुणे दर्शन’ बससेवेच्या धर्तीवर आता ‘पुणे व पिंपरी-चिंचवड दर्शन’ (बससेवा क्र. २) सुरू करण्यात आली असून १० जूनपासून ही सेवा प्रवाशांच्या सेवेत दाखल झाली आहे. अवघ्या ५०० रुपयांत पर्यटकांना पुणे आणि पिंपरी-चिंचवडमधील १० प्रमुख धार्मिक, ऐतिहासिक, सांस्कृतिक आणि मनोरंजनात्मक स्थळांची एकदिवसीय सफर करता येणार आहे. पिंपरी-चिंचवड महानगरपालिकेच्या सूचनेनुसार सुरू करण्यात आलेली ही सेवा दोन्ही शहरांचा सांस्कृतिक वारसा आणि पर्यटन वैभव अनुभवण्याची संधी देणार आहे. या विशेष सहलीत चिंचवड येथील सायन्स पार्क, रावेतमधील इस्कॉन मंदिर, क्रांतिकारक चाफेकर बंधू स्मारकाचे बाह्य दर्शन, श्री मोरया गोसावी मंदिर, तसेच पुण्यातील चतुःश्रृंगी माता मंदिर, डॉ. बाबासाहेब आंबेडकर संग्रहालय, शिवाजीनगरमधील एव्हिएशन गॅलरी, सारसबागेतील श्री सिद्धिविनायक गणपती मंदिर, महालक्ष्मी मंदिराचे बाह्य दर्शन आणि पु. ल. देशपांडे उद्यानाचा समावेश करण्यात आला आहे. विज्ञान, इतिहास, धर्म आणि निसर्ग यांचा संगम असलेली ही सहल सर्व वयोगटातील पर्यटकांसाठी आकर्षण ठरणार आहे. सायन्स पार्क सोमवारी बंद असल्यामुळे त्या दिवशी पर्यायी नियोजन करण्यात येणार असल्याचे पीएमपी प्रशासनाने स्पष्ट केले आहे. या विशेष बससेवेचे तिकीट प्रति व्यक्ती ५०० रुपये निश्चित करण्यात आले असून बस पुणे स्टेशन डेपो आणि डेक्कन जिमखाना बसस्थानक या दोन ठिकाणांहून सुटणार आहे. पुणे स्टेशन डेपो येथून बस सकाळी ७.४५ वाजता सुटून रात्री ७ वाजता परत येईल, तर डेक्कन जिमखाना येथून सकाळी ८ वाजता सुटणारी बस सायंकाळी ६.३० वाजता परतणार आहे. पर्यटकांना भेट दिल्या जाणाऱ्या प्रत्येक स्थळाची माहिती मिळावी यासाठी बसमध्ये विशेष मार्गदर्शकाचीही नियुक्ती करण्यात आली आहे. त्यामुळे प्रवाशांना प्रत्येक ठिकाणाचा इतिहास, महत्त्व आणि वैशिष्ट्ये समजून घेता येणार आहेत. या बससेवेची तिकिटे डेक्कन जिमखाना बसस्थानक आणि मोलेदिना बसस्थानक (पुणे स्टेशन) येथे आगाऊ उपलब्ध असून कमी खर्चात पुणे आणि पिंपरी-चिंचवडमधील पर्यटनस्थळांचा अनुभव घेऊ इच्छिणाऱ्यांसाठी ही सेवा मोठी पर्वणी ठरणार आहे.
पीएमपीएमएलच्या (PMPML) या नवीन पर्यटन बससेवेमध्ये समाविष्ट असलेली १० प्रमुख पर्यटन स्थळे खालीलप्रमाणे आहेत:
पिंपरी-चिंचवडमधील स्थळे:
१. सायन्स पार्क (चिंचवड): विज्ञान आणि तंत्रज्ञानावर आधारित प्रदर्शन.
२. इस्कॉन मंदिर (रावेत): भव्य आणि शांत वास्तुकलेचे प्रतीक.
३. चाफेकर बंधू स्मारक (चिंचवड): क्रांतीकारकांच्या आठवणींना उजाळा देणारे ठिकाण.
४. श्री मोरया गोसावी मंदिर (चिंचवड): ऐतिहासिक आणि धार्मिक महत्त्व असलेले गणेश मंदिर.
५. प्रति-शिर्डी (शिरगाव): शिर्डीच्या साईबाबा मंदिराची प्रतिकृती.
पुणे शहरातील स्थळे:
६. चतु:श्रृंगी माता मंदिर: टेकडीवर वसलेले पुण्याचे प्राचीन मंदिर.
७. डॉ. बाबासाहेब आंबेडकर संग्रहालय: त्यांच्या जीवनकार्यावर आधारित विशेष प्रदर्शन.
८. शिवाजीनगर एव्हिएशन गॅलरी: विमान उड्डाण क्षेत्रातील माहिती देणारे केंद्र.
९. सारसबाग (सिद्धिविनायक गणपती): ऐतिहासिक बाग आणि तलावातील प्रसिद्ध गणपती मंदिर.
१०. पु. ल. देशपांडे उद्यान (ओकायामा गार्डन): जपानी शैलीतील निसर्गरम्य उद्यान.
