पुणे : प्रवाशांसाठी आनंदाची बातमी असून बहुप्रतिक्षित मुंबई–बंगळुरू वंदे भारत स्लीपर एक्सप्रेस १ नोव्हेंबर रोजी रुळावर येणार आहे. उद्घाटनानंतर ३ नोव्हेंबरपासून ही ट्रेन नियमित धावणार असून, महाराष्ट्रातून धावणारी ही पहिलीच वंदे भारत स्लीपर एक्सप्रेस ठरणार आहे. या हायस्पीड स्लीपर ट्रेनमुळे पुणे–बंगळुरू प्रवासाचा कालावधी तब्बल पाच तासांनी कमी होणार असून, हा प्रवास आता अवघ्या १३ तासांत पूर्ण होणार आहे. १ नोव्हेंबर रोजी सकाळी ११.३० वाजता बंगळुरू स्थानकावर या ट्रेनचा उद्घाटन सोहळा होईल. त्यानंतर रायचूर, यादगीर, कलबुर्गी, सोलापूर आणि पुणे स्थानकांवर या गाडीचे स्वागत करण्यात येणार आहे. उद्घाटनाची पहिली फेरी रविवारी रात्री ११ वाजण्याच्या सुमारास पुणे स्थानकात दाखल होईल. सुमारे १० ते १५ मिनिटांच्या थांब्यानंतर ही गाडी मध्यरात्री ३ वाजता मुंबईत पोहोचेल. या आधुनिक ट्रेनमध्ये एकूण १६ डबे असून ८२३ प्रवाशांची क्षमता आहे. त्यामध्ये ११ एसी थ्री टियर डबे (६११ बर्थ), ४ एसी टू टियर डबे (१८८ बर्थ) आणि १ एसी फर्स्ट क्लास डबा (२४ बर्थ) असणार आहे.
ही वंदे भारत स्लीपर एक्सप्रेस आठवड्यातून सहा दिवस धावणार असून, बंगळुरूहून दर सोमवारी आणि मुंबईहून दर मंगळवारी सेवा बंद राहणार आहे. गाडी क्रमांक २७६५२ बंगळुरूहून सायंकाळी ७.४५ वाजता सुटून सोलापूर येथे पहाटे ४.२० वाजता, पुणे येथे सकाळी ८ वाजता आणि मुंबईत सकाळी ११.५५ वाजता पोहोचेल. तर गाडी क्रमांक २७६५१ मुंबईहून रात्री ८.१० वाजता सुटून पुणे येथे ११.४० वाजता, सोलापूर येथे पहाटे ३ वाजता आणि बंगळुरू येथे दुपारी १२ वाजता पोहोचेल. अत्याधुनिक सुविधा, आरामदायी स्लीपर कोच आणि कमी प्रवासाचा कालावधी यामुळे ही सेवा महाराष्ट्र आणि कर्नाटकातील प्रवाशांसाठी मोठा दिलासा ठरणार आहे. विशेषतः व्यावसायिक, विद्यार्थी आणि नियमित प्रवास करणाऱ्या प्रवाशांना या नव्या सेवेमुळे जलद, सुरक्षित आणि अधिक आरामदायी प्रवासाचा पर्याय उपलब्ध होणार आहे.
