नवी दिल्ली : वेस्ट इंडिजच्या दौऱ्यासाठी आता भारतीय संघाची घोषणा करण्यात आली आहे. या दौऱ्यासाठी रोहित शर्माला विश्रांती दिली जाणार असल्याचे म्हटले जात होते. हा संघ जाहीर करताना बीसीसीआयने रोहितकडे नेतृत्व करण्याची जबाबदारी दिली आहे. बीसीसीआयने दौऱ्यातील कसोटी आणि वनडेसाठीचा संघ जाहीर केलाय. या दौऱ्यात रोहित दोन्ही कसोटी सामने खेळणार नाही आणि त्याच्या जागी अजिंक्य राहणेला भारतीय कसोटी संघाचे कर्णधारपद देण्यात येईल, असे म्हटले जात होते. त्यामुळे रोहितला विश्रांती मिळणार का, याची जोरदार चर्चा सुरु झाली होती. याबाबत अखेर बीसीसीआयने आपला निर्णय जाहीर केला आहे.
असा आहे भारताचा कसोटी संघ
रोहित शर्मा (कर्णधार), शुभमन गिल, ऋतुराज गायकवाड, विराट कोहली, यशस्वी जयसवाल, अजिंक्य रहाणे (उपकर्णधार), केएस भरत, ईशान किशन, आर अश्विन, आर जडेजा, शार्दुल ठाकूर, अक्षर पटेल, मोहम्मद सिराज, मुकेश कुमार, जयदेव उनाडकट, नवदीप सैनी
वनडे मालिकेचा संघ
रोहित शर्मा (कर्णधार), शुभमन गिल, ऋतुराज गायकवाड, विराट कोहली, सूर्यकुमार यादव, संजू सॅमसन, ईशान किशन, हार्दिक पंड्या{उपकर्णधार} , शार्दूल ठाकूर, रविंद्र जडेजा, अक्षर पटेल, यजुवेंद्र चहल, कुलदीप यादव, जयेदव उनाडकट, मोहम्मद सिराज, उमारन मलिक, मुकेश कुमार
भारत आणि वेस्ट इंडिज यांच्यामध्ये दोन कसोटी, तीन वनडे आणि पाच टी-२० सामन्यांची मालिका खेळवण्यात येणार आहे. हा दौरा १२ जुलैपासून सुरु होणार असल्याचे म्हटले जात आहे. पण वेस्ट इंडिजच्या संघाला हा दौरा १५ जुलैपासून सुरु व्हावा, असे वाटत आहे. कारण सध्याच्या घडीला वेस्ट इंडिजचा संघ हा विश्वचषकाच्या पात्रता फेरीत खेळत आहे. ही पात्रता फेरी ९ जुलैला संपणार आहे. ही स्पर्धा झिम्बाब्वे येथे सुरु आहे. हरारे येथून वेस्ट इंडिजला यायला दोन दिवस लागतात. त्यामुळे वेस्ट इंडिजचा संघ हा ११ जुलैला मायदेशी पोहोचेल. त्यामुळे त्यांना लगेच दुसऱ्या दिवसापासून कसोटी सामना खेळणे कठीण होईल. त्यामुळे आता भारताच्या या दौऱ्यात बदल होणार असल्याचे संकेत मिळाले आहेत. जर ही मालिका पुढे नेण्यात आली तरी १५ जुलैला सुरुवात होईल, असे म्हटले जात आहे. त्यामुळे आता ही मालिका उशिरा संपणार असल्याचेही म्हटले जात आहे. या मालिकेतील दोन सामने वेस्ट इंडिजच्या बाहेर होणार आहे. या दौऱ्यातील अखेरचे दोन सामने हे अमेरिकेत खेळवण्यात येणार आहे. अमेरिकेत क्रिकेटचा विकास व्हावा यासाठी हे दोन्ही सामने अमेरिकेत खेळवण्यात येणार आहेत. त्यामुळे या दौऱ्यात आता भारतीय संघ कशी कामगिरी करतो, याकडे सर्वांचा लक्ष लागलेले असणार आहे.
