पुणे : ‘पुणे महानगर परिवहन महामंडळा’ने (पीएमपी) पुढील टप्प्यातील मेट्रो मार्ग सुरू झाल्यानंतर त्यांना ‘फिडर’ सेवा देण्यासाठी स्टेशनची पाहणी करून बस सुरू करण्याचे नियोजन केले आहे. मेट्रो सुरू होण्याच्या दिवसापासूनच ‘पीएमपी’कडून २४ बसच्या माध्यमातून ‘फिडर’ सेवा दिली जाणार आहे. त्यानंतर प्रवाशांच्या मागणीनुसार सेवा वाढविण्यात येणार आहे. ‘महामेट्रो’कडून वनाझ ते गरवारे आणि पिंपरी-चिंचवड ते स्वारगेट या मार्गावर मेट्रोचे काम सुरू आहे. त्यापैकी वनाझ ते गरवारे महाविद्यालयापर्यंत मेट्रो सुरू झाली असून, लवकरच ती रुबी हॉलपर्यंत सुरू होणार आहे. या मार्गावर सेवा सुरू झाल्यानंतर पाच मेट्रो स्टेशनपासून ‘पीएमपी’ची ‘फिडर’ सेवा सुरू केली जाणार आहे. त्या ठिकाणाहून १२ बस वेगवेगळ्या मार्गांवर धावणार आहेत. वनाझ मेट्रो स्टेशनपासून पाच आणि नळस्टॉप मेट्रो स्टेशनपासून चार गाड्या सोडण्यात येणार आहेत.
पिंपरी-चिंचवड ते फुगेवाडी दरम्यानच्या दुसऱ्या मेट्रो मार्गावर सध्या सेवा सुरू आहे. लवकर ही सेवा सिव्हिल कोर्टापर्यंत सुरू होणार आहे. त्यामुळे ‘पीएमपी’ची मेट्रो स्टेशन येथून १२ बसच्या माध्यमातून ‘फिडर’ सेवा देण्याचे नियोजन आहे. त्यापैकी पाच बस पिंपरी मेट्रो स्टेशन येथून, संत तुकारामनगरहून एक, नाशिक फाट्याहून तीन, दापोडी, बोपोडी आणि शिवाजीनगर मेट्रो स्टेशनपासून प्रत्येकी एक बस सुरू केली जाणार आहे.
‘मेट्रो’ आणि ‘पीएमपी’च्या अधिकाऱ्यांनी मेट्रो मार्गावर संयुक्त पाहणी केली. त्या स्टेशनचा परिसर आणि तेथून प्रवास करणाऱ्या प्रवाशांची संख्या लक्षात घेऊन सध्या बसची संख्या निश्चित केली आहे. काही मेट्रो स्टेशनजवळ ‘पीएमपी’ची स्थानके आणि थांबे आहेत. त्यामुळे तिथे नवीन बस सेवा सुरू केलेली नाही. मेट्रो सुरू झाल्यानंतर प्रवाशांची मागणी आणि गर्दी पाहून ‘पीएमपी’कडून देण्यात येणारी ‘फिडर’ सेवा वाढविण्यात येणार आहे. या सेवेसाठी नव्याने येणाऱ्या सात मीटरच्या बसचा वापर केला जाणार आहे. मेट्रोला फिडर सेवा देण्यासाठी संयुक्त पाहणी करून कुठून बस सुरू करायचे याचे नियोजन केले आहे. मेट्रो सुरू झाल्यानंतर पीएमपीकडून फिडर सेवा सुरू केली जाईल.