कोल्हापूर : मुरगुड पोलिस व स्थानिक गुन्हे अन्वेषणच्या पथकाने एक मोठी कारवाई केली आहे. टीईटी परीक्षेचा पेपर फोडण्याच्या तयारीत असणाऱ्या टोळीचा पर्दाफाश केला आहे. याप्रकरणी मुरगुड पोलिस व स्थानिक गुन्हे अन्वेषणच्या पथकाने नऊ जणांना ताब्यात घेतले आहे. संपूर्ण राज्यभरामध्ये आज शिक्षक पात्रता परीक्षा (TET) सुरू आहे. आज राज्यभरामध्ये शिक्षक पात्रता परीक्षेसाठी लाखो परीक्षार्थी शिक्षक परीक्षा देत आहेत. अनेक केंद्रावर ही परीक्षा अत्यंत सुरळीतपणे सुरू आहे, पण कोल्हापूर जिल्ह्यामध्ये मात्र हा पेपरच फोडण्याचा प्रयत्न झाल्याने शिक्षण क्षेत्रात गोंधळ उडाला आहे.
आरोपीमध्ये काही शाळेतील परीक्षार्थी शिक्षकांचाही सहभाग आहे. सर्व आरोपींना कागल तालुक्यातील सोनगे येथून पोलिसांनी ताब्यात घेतले आहे. ताब्यात घेतलेले सर्व आरोपी कागल आणि राधानगरी तालुक्यातील आहेत. काल सायंकाळपासून रात्रभर पोलीस या घटनेचा तपास करत असून, अजूनही संशयित आरोपींची संख्या वाढण्याची शक्यता नाकारता येत नाही. दरम्यान, टीईटी परीक्षेत मराठी माध्यमाचे उमेदवार सर्वाधिक आहेत. आज परीक्षा देण्यासाठी असंख्य विधाथी केंद्रात आले होते. मराठीसाठी तीन लाख २७ हजार १३५, इंग्लिशमधून २८ हजार ४३७, उर्दू २५ हजार ९३५, हिंदी ९२ हजार ४२०, बंगाली माध्यमातून १६८, कन्नड १४६८, तेलगू ३०, गुजराथी ७५ आणि सिंधी माध्यमातून केवळ एका उमेदवाराने नोंदणी केली आहे. तसेच राज्यातून ५२२८ दिव्यांग उमेदवारांनी परीक्षेला नोंदणी केली आहे. तसेच ४११ दिव्यांग उमेदवारांना लेखनिक पुरविण्यात आला आहे. माजी सैनिक असलेले ४५ उमेदवार परीक्षा देणार आहेत. परीक्षेनंतर ४५ दिवसात टीईटीचा निकाल जाहीर केला जाणार आहे.
