मुंबई : महाराष्ट्र पोलीस दलातील शिस्त आणि सुरक्षेच्या दृष्टीने राज्य सरकारने एक अत्यंत महत्त्वाचा निर्णय घेतला आहे. यापुढे पोलीस दलातील जवानांना गणवेशात असताना रिल्स, मिनी-व्लॉग किंवा कोणताही सोशल मीडिया व्हिडिओ बनवण्यास सक्त मनाई करण्यात आली आहे. विशेष शाखेने यासंदर्भात अधिकृत परिपत्रक जारी केले असून या नियमाचे उल्लंघन करणाऱ्यांवर कठोर शिस्तभंगविषयक कारवाई करण्याचा इशारा देण्यात आला आहे. विशेष शाखेचे उपायुक्त दत्तात्रय कांबळे यांनी जारी केलेल्या परिपत्रकानुसार, हा आदेश महाराष्ट्र पोलिस दलातील सुमारे ५१,००० पोलीस अधिकाऱ्यांना लागू आहे. रील, मिनी-व्हलॉग किंवा इतर सोशल मीडिया व्हिडिओ पोस्ट करणे तात्काळ थांबवण्याचे निर्देश देण्यात आले आहेत. या नव्या आदेशामुळे महाराष्ट्र पोलीस दलातील जवानांना आता सोशल मीडियावर व्हिडिओ पोस्ट करताना विशेष खबरदारी घ्यावी लागणार आहे.
सोशल मीडियावरील या ट्रेंडवर नियंत्रण मिळवण्यासाठी मुंबई पोलीस सोशल मीडिया लॅबला विशेष जबाबदारी देण्यात आली आहे. ही लॅब विविध ऑनलाइन प्लॅटफॉर्मवर सतत लक्ष ठेवणार असून नियमांचे उल्लंघन करणाऱ्या कर्मचाऱ्यांचा अहवाल वरिष्ठांना सादर करणार आहे. आदेशाचे उल्लंघन करणाऱ्यांवर कठोर शिस्तभंगाची कारवाई केली जाईल, असा इशाराही देण्यात आला आहे. गणवेशात व्हिडिओ बनवताना अनेकदा अनवधानाने पोलीस ठाण्यातील अंतर्गत जागा, सरकारी वाहने, शस्त्रे आणि अत्यंत महत्त्वाची उपकरणे कॅमेऱ्यात कैद होतात. यामुळे पोलीस दलाची गोपनियता आणि ऑपरेशनल सुरक्षा धोक्यात येण्याची शक्यता आहे. काही अधिकारी आणि कर्मचारी वैयक्तिक लोकप्रियतेसाठी संवेदनशील पार्श्वभूमीवर व्हिडिओ बनवत असल्याचे समोर आल्याने ही बंदी घालण्यात आली आहे. सोशल मीडियावर असे व्हिडिओ आढळल्यास संबंधित कर्मचाऱ्यावर तात्काळ कारवाई करण्याचे निर्देश देण्यात आले आहेत. या आदेशाची काटेकोरपणे अंमलबजावणी करण्यासाठी, मुंबई पोलिसांच्या सोशल मीडिया लॅबला विशेष जबाबदारी सोपवण्यात आली आहे. फेसबुक, इंस्टाग्राम आणि एक्स (पूर्वी ट्विटर) सारख्या प्लॅटफॉर्मवर सतत लक्ष ठेवण्याचे निर्देश लॅब अधिकाऱ्यांना देण्यात आले आहेत. जर कोणताही पोलिस अधिकारी नियमांचे उल्लंघन करताना आढळला तर कारवाई सुरू करण्यासाठी त्यांच्या वरिष्ठांना त्वरित अहवाल सादर केला जाईल.
