मुंबई : रिलायन्स इंडस्ट्रीजचे अध्यक्ष आणि सुप्रसिद्धउद्योगपती मुकेश अंबानी यांना धमकीचे एकापाठोपाठ एक धमकीचे पाच ईमेल धाडणाऱ्या आरोपीला बेड्या ठोकण्यात आल्या आहेत. मुंबई पोलिसांनी आरोपीला तेलंगणा येथून अटक केली. गणेश रमेश वानपाधरी असे या तरूणाचे नाव असून पोलिसांनी त्याला शनिवारी न्यायालयात हजर केले. न्यायालयाने गणेशला ८ नोव्हेंबर पर्यंत पोलिस कोठडी सुनावली आहे. आठवड्याभरात अंबानी यांच्या कार्यालयीन मेलवर पाच ईमेल आले. आधी २० कोटी नंतर २०० कोटी आणि मेलला प्रतिसाद देत नाही म्हणून ४०० कोटी खंडणीची मागणी करण्यात आली होती. खंडणी न दिल्यास ठार मारण्याची धमकी देण्यात आली होती.
गेल्या आठवड्यात मुकेश अंबानींना धमकीचा पहिला ईमेल आला होता. त्यानंतर ३१ ऑक्टोबर आणि एक नोव्हेंबर या दोन दिवसात आणखी दोन ईमेल पाठवण्यात आले होते. पहिल्या मेलकडे दुर्लक्ष केल्याने दुसऱ्यात २० कोटींऐवजी ४० कोटींची मागणी करण्यात आली होती. त्यानंतर पाच दिवसांच्या कालावधीत मेल्सची संख्या आणि खंडणीची रक्कमही वाढत गेली. मुंबई पोलीस, गुन्हे शाखा आणि सायबर क्राईम विभाग यावर तपास करत होते. अखेर मुंबई पोलिसांना आरोपीला तेलंगणा येथून अटक करण्यात यश आले आहे.