मुंबई : मराठी चित्रपटसृष्टीत नव्या पिढीचे कलाकार दमदार पाऊल टाकत असताना, ज्येष्ठ अभिनेते सयाजी शिंदे यांचा मुलगा सिद्धार्थ सयाजी शिंदे आता रुपेरी पडद्यावर पदार्पण करण्यासाठी सज्ज झाला आहे. आगामी ‘विष्णूबाळा’ या मराठी चित्रपटातून सिद्धार्थ आपल्या अभिनय कारकिर्दीची सुरुवात करणार असून, विशेष म्हणजे पहिल्याच चित्रपटात तो वडील सयाजी शिंदे यांच्यासोबत स्क्रीन शेअर करताना दिसणार आहे. महाविद्यालयीन जीवनापासून अभिनयाची आवड असलेल्या सिद्धार्थने या क्षेत्रात व्यावसायिक प्रशिक्षण घेतल्यानंतर मराठी चित्रपटातूनच पदार्पण करण्याचा निर्णय घेतला. त्यामुळे ‘विष्णूबाळा’ हा चित्रपट त्याच्यासाठी विशेष ठरणार आहे. बाप-लेकाची ही जोडी पहिल्यांदाच मोठ्या पडद्यावर एकत्र झळकणार असल्याने चित्रपटाविषयी प्रेक्षकांमध्ये उत्सुकता वाढली आहे.
सत्यघटनेवर आधारित असलेल्या ‘विष्णूबाळा’ या चित्रपटात संघर्षातून उभ्या राहिलेल्या एका नायकाची प्रेरणादायी कथा पाहायला मिळणार आहे. चित्रपटातील मध्यवर्ती विष्णूबाळा ही भूमिका सयाजी शिंदे साकारणार असून, सिद्धार्थही महत्त्वपूर्ण भूमिकेत दिसणार आहे. चित्रपटाचे लेखन अरविंद जगताप यांनी केले असून, ‘रावरंभा’ या चित्रपटातून लक्ष वेधून घेणारे अनुप जगदाळे दिग्दर्शनाची धुरा सांभाळत आहेत. शिव समर्थ फिल्म प्रोडक्शन आणि सिनेमॅटिक सफारी फिल्म प्रोडक्शन यांच्या निर्मितीत साकारत असलेला हा चित्रपट मराठीसह हिंदी, तेलुगू आणि तमिळ अशा चार भाषांमध्ये प्रदर्शित होणार आहे. अनुभवी सयाजी शिंदे यांचा दमदार अभिनय आणि सिद्धार्थचे पहिले पाऊल यामुळे ‘विष्णूबाळा’कडे चित्रपटप्रेमींचे विशेष लक्ष लागले असून, ही बाप-लेकाची जोडी प्रेक्षकांच्या मनावर किती प्रभाव पाडते, याची उत्सुकता वाढली आहे.
