पुणे : बनावट क्रीडा प्रमाणपत्रांच्या आधारे शासकीय नोकऱ्या मिळवून देणाऱ्या मोठ्या रॅकेटचा पुणे गुन्हे शाखेने पर्दाफाश केला असून, या प्रकरणात १४ पोलीस कर्मचाऱ्यांसह एकूण २५ जणांना अटक करण्यात आली आहे. खेळाडूंसाठी असलेल्या ५ टक्के आरक्षणाचा गैरफायदा घेण्यासाठी २०१६ ते २०२६ या कालावधीत ‘कुराश’ आणि ‘ड्रॅगनबोट’ या क्रीडा प्रकारांच्या नावावर प्रत्यक्ष स्पर्धाच न घेता बनावट प्रमाणपत्रे तयार करण्यात आल्याचा तपासात खुलासा झाला आहे. या प्रमाणपत्रांच्या आधारे अनेक उमेदवारांनी पोलीस आणि इतर शासकीय विभागांत नोकऱ्या मिळवल्याचे समोर आले आहे. यापूर्वी महाराष्ट्र राज्य कुराश असोसिएशनचे अध्यक्ष अंकुश नागर आणि सचिव शिवाजी साळुंखे यांच्यासह या रॅकेटच्या प्रमुख सूत्रधारांना अटक करण्यात आली होती. त्यानंतर तपासाची व्याप्ती वाढवत गुन्हे शाखेने पोलीस दलात भरती झालेल्या ८ प्रशिक्षणार्थी आणि ६ इतर कर्मचाऱ्यांना अटक केली.
या घोटाळ्यातील आरोपींवर कठोर कारवाई सुरू असून, पोलीस आयुक्त अमितेश कुमार यांनी १९ उमेदवारांना पोलीस सेवेतून कायमचे बडतर्फ करण्याची प्रक्रिया सुरू असल्याची माहिती दिली आहे. काही आरोपींना येरवडा कारागृहात रवानाही करण्यात आली आहे. तपासादरम्यान राज्यभरात सुमारे १ हजारांहून अधिक बनावट क्रीडा प्रमाणपत्रे वितरित झाल्याचा संशय व्यक्त करण्यात आला असून, या आधारे इतर शासकीय विभागांमध्येही नोकऱ्या मिळाल्या आहेत का, याची चौकशी सुरू आहे. यासाठी विविध विभागांशी पत्रव्यवहार करण्यात येत असून, संबंधित नियुक्त्यांची पडताळणी केली जात आहे. या कारवाईमुळे शासकीय भरती प्रक्रियेतील गैरप्रकार उघडकीस आले असून, संपूर्ण प्रकरणाची सखोल चौकशी करून दोषींवर कठोर कारवाई करण्याचा निर्धार पुणे पोलिसांनी व्यक्त केला आहे.
