मुंबई : मुंबई आणि नवी मुंबई विमानतळांच्या भविष्यातील कामकाजाबाबत सुरू असलेल्या चर्चेला महत्त्वाचे वळण मिळाले आहे. मुंबई विमानतळावरील आंतरराष्ट्रीय उड्डाणे नवी मुंबई आंतरराष्ट्रीय विमानतळावर स्थलांतरित करण्याची कोणतीही योजना नसल्याचे मुख्यमंत्री देवेंद्र फडणवीस यांनी स्पष्ट केले आहे. दोन्ही विमानतळे स्वतंत्रपणे आणि त्यांच्या क्षमतेनुसार कार्यरत राहावीत, अशी राज्य सरकारची भूमिका असून यासंदर्भात त्यांनी केंद्रीय नागरी विमान वाहतूक मंत्र्यांना पत्र पाठवले आहे. मुंबई विमानतळाच्या टर्मिनल-१ च्या पुनर्विकासासाठी टप्प्याटप्प्याने काम करण्याचा पर्यायी प्रस्तावही त्यांनी मांडला आहे. या प्रस्तावानुसार प्रथम टर्मिनल 1B चे बांधकाम पूर्ण करण्यात यावे. त्यानंतर टर्मिनल 1A वरून सुरू असलेल्या सर्व विमानसेवा नव्या टर्मिनल 1B मध्ये स्थलांतरित करून जुने टर्मिनल 1A पाडून त्याचा पुनर्विकास करण्यात यावा. या पद्धतीमुळे विमानतळाचे नियमित कामकाज सुरू ठेवत पुनर्विकास करता येईल. तसेच प्रवाशांना गैरसोय होणार नाही आणि विमान कंपन्यांनाही त्यांच्या उड्डाणांच्या वेळापत्रकात मोठे बदल करावे लागणार नाहीत.
यापूर्वी मुंबई इंटरनॅशनल एअरपोर्ट लिमिटेड (MIAL) ने टर्मिनल-१ च्या पुनर्विकासासाठी २०२७ च्या उन्हाळी विमान वेळापत्रकापासून १४ आंतरराष्ट्रीय शहरांसाठीची उड्डाणे नवी मुंबई विमानतळावर स्थलांतरित करण्याचा प्रस्ताव मांडला होता. या शहरांमध्ये बहरीन, दम्मम, ढाका, दोहा, फुजैराह, जकार्ता, जेद्दा, काठमांडू, कुवेत सिटी, मदिना, मस्कत, रास अल खैमाह, रियाध आणि शारजाह यांचा समावेश होता. मात्र या प्रस्तावाला अनेक विमान कंपन्यांनी विरोध दर्शवला. मुंबई विमानतळावरून नवी मुंबई विमानतळावर उड्डाणे हलवल्यास कनेक्टिंग फ्लाइट घेणाऱ्या प्रवाशांना दोन्ही विमानतळांदरम्यान प्रवास करावा लागेल, त्यामुळे वेळ आणि खर्च दोन्ही वाढतील, अशी चिंता व्यक्त करण्यात आली होती. मुख्यमंत्री फडणवीस यांनी मांडलेल्या पर्यायी प्रस्तावामुळे आता हा प्रश्न नव्याने चर्चेत आला असून, केंद्रीय नागरी विमान वाहतूक मंत्रालय या प्रस्तावाचा विचार करत आहे. दोन्ही विमानतळे स्वतंत्रपणे कार्यरत ठेवत मुंबई विमानतळाचा विस्तार करण्याबाबत केंद्र सरकारचा अंतिम निर्णय आणि त्यानंतरची अंमलबजावणी प्रवासी तसेच विमान कंपन्यांसाठी महत्त्वाची ठरणार आहे.
