नवी दिल्ली : जगातील आघाडीची तंत्रज्ञान कंपनी मायक्रोसॉफ्टच्या विविध डिजिटल सेवांना मोठ्या तांत्रिक बिघाडाचा फटका बसल्याने जगभरातील लाखो वापरकर्त्यांचे दैनंदिन कामकाज विस्कळीत झाले. आउटलुक ईमेल सेवेसह कंपनीच्या अनेक महत्त्वाच्या प्लॅटफॉर्म्समध्ये अचानक तांत्रिक अडचणी निर्माण झाल्याने ईमेल पाठवणे, प्राप्त करणे आणि इनबॉक्स उघडणेही अनेक वापरकर्त्यांना शक्य झाले नाही. तांत्रिक बिघाडांची नोंद ठेवणाऱ्या ‘डाउनडिटेक्टर’ या प्लॅटफॉर्मवर अल्पावधीतच १ लाख ३० हजारांहून अधिक तक्रारी नोंदविण्यात आल्या. सर्वाधिक परिणाम आउटलुक आणि एक्सचेंज ऑनलाईन मेलबॉक्स सेवांवर झाला असून, त्यामुळे विशेषतः कॉर्पोरेट क्षेत्रातील कर्मचारी आणि व्यावसायिकांना मोठ्या अडचणींचा सामना करावा लागला. याशिवाय, कार्यालयीन संवादासाठी वापरल्या जाणाऱ्या मायक्रोसॉफ्ट टीम्समध्ये लॉगिन आणि संदेशवहनाच्या समस्या निर्माण झाल्या, तर मायक्रोसॉफ्ट ३६५ सेवा आणि कृत्रिम बुद्धिमत्ता आधारित ‘कोपायलट’मध्येही तांत्रिक अडथळे जाणवले.
या घटनेनंतर वॉशिंग्टनमधील रेडमंड येथील मायक्रोसॉफ्ट मुख्यालयाने अधिकृत निवेदन जारी करून तांत्रिक बिघाडाची कबुली दिली. कंपनीने सेवा पूर्ववत करण्यासाठी तातडीने काम सुरू केल्याचे सांगितले असून, उत्तर अमेरिकेतील टीम्स सेवेशी संबंधित समस्या मोठ्या प्रमाणात दूर करण्यात आल्याचा दावा केला आहे. मात्र, काही वापरकर्त्यांना त्यानंतरही अडचणींचा सामना करावा लागत असल्याची माहिती समोर आली. मायक्रोसॉफ्टने दिलेल्या माहितीनुसार, कंपनीच्या पायाभूत सुविधांवरील एका भागावर अचानक वाढलेल्या तांत्रिक भारामुळे कनेक्टिव्हिटीमध्ये अडथळे निर्माण झाले. स्वयंचलित तपासणी प्रक्रियेदरम्यान उद्भवलेल्या तांत्रिक त्रुटींमुळे अनेक सर्व्हर अनपेक्षितपणे बंद पडल्याने या सेवांवर परिणाम झाला. या घटनेनंतर कंपनीने संपूर्ण यंत्रणेचे निरीक्षण वाढवून सेवा पूर्णपणे सुरळीत करण्यासाठी प्रयत्न सुरू ठेवले आहेत.
