मुंबई : राज्यातील औषधांची गुणवत्ता, औषध विक्रीतील नियमांचे पालन आणि बेकायदेशीर उत्पादन-विक्रीला आळा घालण्यासाठी अन्न व औषध प्रशासनाच्या (एफडीए) औषध विभागाने ५ ते १७ ऑक्टोबरदरम्यान राज्यभर विशेष तपासणी मोहीम राबवली. या दोन आठवड्यांच्या मोहिमेत सातही विभागांत एकूण ९३७ तपासण्या करण्यात आल्या. तपासणीत नियमभंग आढळल्याने ४५० नोटिसा बजावण्यात आल्या, तर २९ परवाने रद्द आणि ७१ परवाने निलंबित करण्यात आले. तसेच बेकायदेशीर व्यवहारांवर कारवाई करत २८ लाख ५२ हजार ३०४ रुपयांचा मुद्देमाल जप्त करण्यात आला.
औषध उत्पादक, सौंदर्यप्रसाधने उत्पादक, वैद्यकीय उपकरण उत्पादक, रक्तकेंद्रे, रक्त साठवणूक केंद्रे आणि औषध चाचणी प्रयोगशाळांच्या १०५ तपासण्या करण्यात आल्या. यामध्ये ॲलोपॅथी, आयुर्वेदिक आणि होमिओपॅथी औषध उत्पादकांसह विविध संस्थांची तपासणी करण्यात आली. गंभीर त्रुटी आढळल्यामुळे २२ परवाने निलंबित आणि ७ परवाने रद्द करण्यात आले. याशिवाय विनापरवाना औषध विक्री, सौंदर्यप्रसाधनांचे उत्पादन आणि गुंगीकारक औषधांच्या बेकायदेशीर व्यवहारांवर पाच स्वतंत्र कारवाया करण्यात आल्या. औषध विक्री परवानाधारकांच्या ८३२ तपासण्या करताना नियमांचे उल्लंघन करणाऱ्या विक्रेत्यांना ३८२ नोटिसा देण्यात आल्या. यामध्ये ४९ औषध विक्री परवाने निलंबित, तर २२ परवाने रद्द करण्यात आले. औषधांच्या गुणवत्तेची पडताळणी करण्यासाठी १४९ नमुने तपासणीसाठी पाठविण्यात आले. प्रशासनाच्या तीन प्रयोगशाळांमध्ये २७९ नमुन्यांची चाचणी पूर्ण झाली असून त्यापैकी २५८ नमुने प्रमाणित, तर २१ नमुने अप्रमाणित आढळले. अप्रमाणित नमुन्यांमध्ये १८ कमी दर्जाचे, २ मिथ्याछाप आणि १ बनावट नमुन्याचा समावेश आहे. मुंबई, छत्रपती संभाजीनगर आणि नागपूर येथील प्रयोगशाळांमध्ये हे नमुने अप्रमाणित आढळल्याची माहिती एफडीएने दिली आहे.
