छत्रपती संभाजीनगर : गंगापूर तालुक्यातील ढोरेगाव येथे अन्न व औषध प्रशासन आणि स्थानिक गुन्हे शाखेच्या पथकाने संयुक्त कारवाई करत प्रतिबंधित तंबाखूजन्य पान मसाल्याचा मोठा साठा जप्त केला आहे. या कारवाईत ₹५ लाख २२ हजार ६७० किमतीचा प्रतिबंधित पान मसाला जप्त करण्यात आला असून या प्रकरणी पाच जणांविरुद्ध विविध कलमांनुसार गुन्हा दाखल करण्यात आला आहे. अन्न व औषध प्रशासनाच्या अधिकारी प्रज्ञा प्रमोद सुरसे यांनी दिलेल्या फिर्यादीनुसार मुक्तार नूर सय्यद (रा. ढोरेगाव, ता. गंगापूर), अश्रफ अहमद मिर्झा (रा. भारतनगर, वाळूज), सिराज सय्यद (पूर्ण नाव उपलब्ध नाही), सोयल सय्यद (पूर्ण नाव उपलब्ध नाही) आणि प्रभाकर किसन साळुंखे (रा. लिंबे जळगाव, ता. गंगापूर) यांच्याविरुद्ध गुन्हा नोंदविण्यात आला आहे. आर्थिक फायद्याच्या उद्देशाने प्रतिबंधित तंबाखूजन्य पान मसाल्याचा साठा करून त्याची विक्री व पुरवठा केला जात असल्याची माहिती मिळाल्यानंतर रविवारी (दि. १९) पहाटे सुमारे दोन वाजण्याच्या सुमारास ढोरेगाव येथील रॉयल पान सेंटरवर संयुक्त छापा टाकण्यात आला. या कारवाईदरम्यान विक्रीसाठी साठवून ठेवलेला मोठ्या प्रमाणातील प्रतिबंधित पान मसाला जप्त करण्यात आला. या प्रकरणी पोलीस हवालदार व्ही. एल. पाखरे यांनी गुन्हा दाखल केला असून पोलीस निरीक्षक सलीम चाऊस यांच्या मार्गदर्शनाखाली पुढील तपास सुरू आहे.
दरम्यान, या धडक कारवाईची माहिती गंगापूर शहरासह संपूर्ण तालुक्यात वेगाने पसरल्यानंतर प्रतिबंधित गुटखा आणि पान मसाल्याची विक्री करणाऱ्या अनेक टपरी चालकांमध्ये भीतीचे वातावरण निर्माण झाले. कारवाईच्या धास्तीने अनेकांनी तातडीने आपल्या दुकानांचे शटर बंद केले. अन्न व औषध प्रशासन आणि स्थानिक गुन्हे शाखेने संयुक्तपणे केलेल्या या कारवाईमुळे प्रतिबंधित तंबाखूजन्य पदार्थांच्या अवैध विक्रीविरोधात प्रशासनाने कठोर भूमिका घेतल्याचे स्पष्ट झाले आहे. अशा प्रकारच्या अवैध साठवणूक, विक्री आणि पुरवठ्यावर पुढील काळातही सातत्याने कारवाई केली जाणार असल्याचे संकेत या कारवाईतून मिळत आहेत. त्यामुळे गंगापूर तालुक्यात प्रतिबंधित तंबाखूजन्य पदार्थांची विक्री करणाऱ्यांमध्ये मोठी खळबळ उडाली असून कायद्याचे उल्लंघन करणाऱ्यांविरोधात कठोर पावले उचलली जातील, असा इशाराही या कारवाईतून देण्यात आला आहे.
