वृत्तसंस्था : धुरंधर २ या चित्रपटाने बॉक्स ऑफिसवर मोठे यश मिळवल्यानंतर सोशल मीडियावर काही व्हिडिओ वेगाने व्हायरल झाले आहेत. या चित्रपटाची कथा पाकिस्तानातील लियारी भागातील अंडरवर्ल्डमध्ये घुसखोरी करणाऱ्या एका भारतीय गुप्तहेराभोवती फिरते. याच पार्श्वभूमीवर काही व्हिडिओंना जोडत असा दावा करण्यात आला की पाकिस्तानमध्ये पोलिसांनी रस्त्यावर अचानक तपासणी वाढवली आहे.
व्हायरल झालेल्या एका व्हिडिओमध्ये काही पोलीस रस्त्यावर लोकांना थांबवून चौकशी करताना दिसतात. या क्लिपमध्ये पोलीस एका रस्त्याच्या कडेला झोपलेल्या वृद्ध व्यक्तीजवळ जातात, त्याची चादर काढून त्याला त्याची ओळख आणि तो कुठून आला याबद्दल प्रश्न विचारतात. तपासणी केल्यानंतर काहीही संशयास्पद आढळत नसल्याने ते तेथून निघून जातात. हा व्हिडिओ मोठ्या प्रमाणावर शेअर करण्यात आला असून तो चित्रपटाच्या रिलीजशी संबंधित असल्याचा दावा करण्यात आला आहे. विशेष म्हणजे हा चित्रपट पाकिस्तानमध्ये प्रदर्शित झालेला नाही. मात्र फॅक्ट-चेकनुसार हे दावे चुकीचे असल्याचे समोर आले आहे. ‘Grok’ च्या माहितीनुसार हा व्हिडिओ अलीकडचा नसून त्याचा ‘धुरंधर २’ शी कोणताही संबंध नाही. हा व्हिडिओ कराची पोलिसांच्या जुन्या कारवाईदरम्यानचा असल्याचे मानले जाते, जो बहुधा लियारी परिसरातील आहे आणि मूळतः एका इन्स्टाग्राम क्रिएटरने शेअर केला होता. अशा प्रकारचे अनेक व्हिडिओ २०२५ च्या मध्यापासून उपलब्ध आहेत. ज्यामध्ये नियमित तपासणी किंवा स्थानिक पोलिसांची कारवाई दिसून येते आणि त्याचा चित्रपटाच्या कथेशी किंवा गुप्तहेरांच्या भीतीशी काहीही संबंध नाही.
