मुंबई : पश्चिम आशियातील संघर्षामुळे गेल्या काही दिवसांपासून आंतरराष्ट्रीय बाजारात कच्च्या तेलाच्या किमतीत मोठी वाढ झाली होती. त्याचा परिणाम भारतातील इंधन आणि द्रवरूप पेट्रोलियम वायूच्या किमतींवरही झाला होता. विशेषतः व्यावसायिक गॅस सिलिंडरच्या दरात सातत्याने वाढ होत असल्याने हॉटेल, उपाहारगृहे, खाद्यपदार्थ व्यवसाय आणि इतर व्यावसायिकांवर अतिरिक्त आर्थिक भार पडत होता. मात्र आता परिस्थिती हळूहळू पूर्वपदावर येत असून तेल विपणन कंपन्यांनी व्यावसायिक ग्राहकांना मोठा दिलासा दिला आहे. १ जुलैपासून १९ किलो वजनाच्या व्यावसायिक द्रवरूप पेट्रोलियम वायू सिलिंडरच्या दरात १८३ रुपये ५० पैशांची कपात करण्यात आली आहे. त्यामुळे देशभरातील लाखो व्यावसायिकांना गॅस खर्चात थेट बचत होणार आहे. नव्या दरांनुसार अनेक शहरांमध्ये व्यावसायिक सिलिंडरचे दर लक्षणीयरीत्या कमी झाले आहेत. मात्र, १४.२ किलोच्या घरगुती गॅस सिलिंडरच्या किमतीत कोणताही बदल करण्यात आलेला नसून घरगुती ग्राहकांना पूर्वीप्रमाणेच दर मोजावे लागणार आहेत.
नव्या दरांनुसार राजधानी दिल्ली येथे १९ किलोचा व्यावसायिक गॅस सिलिंडर आता ३ हजार ११३ रुपये ५० पैशांऐवजी २ हजार ९३० रुपयांना उपलब्ध होणार आहे. लखनऊ येथे हा सिलिंडर ३ हजार २३६ रुपयांवरून ३ हजार ५२ रुपये ५० पैशांवर आला आहे. कोलकाता येथे कपातीनंतर व्यावसायिक सिलिंडरची किंमत ३ हजार ८१ रुपये ५० पैसे इतकी झाली आहे. तर मुंबई येथे १९ किलोचा व्यावसायिक सिलिंडर आता २ हजार ७०३ रुपयांना उपलब्ध होणार आहे. तसेच पटना येथे या सिलिंडरची किंमत ३ हजार २२७ रुपये इतकी निश्चित करण्यात आली आहे. शहरानुसार वाहतूक खर्च, स्थानिक कर आणि इतर घटकांमुळे दरात काही प्रमाणात फरक असू शकतो. व्यावसायिक गॅस सिलिंडरच्या दरातील या मोठ्या कपातीमुळे उपाहारगृहे, भोजनालये, मिठाई उत्पादक, खानावळी तसेच लघुउद्योजकांच्या खर्चात घट होण्याची अपेक्षा व्यक्त केली जात असून त्याचा अप्रत्यक्ष लाभ ग्राहकांनाही मिळण्याची शक्यता आहे.
१९ किलो व्यावसायिक सिलिंडर (Commercial LPG) :
- मुंबई: ₹२,८८५.
- दिल्ली: ₹२,९३०
- कोलकाता: ₹३,०७२
- चेन्नई: ₹३,१००
