पुणे : पुण्यात गॅस टंचाईच्या पार्श्वभूमीवर घरगुती गॅस सिलिंडरचा काळाबाजार सुरू असल्याचा धक्कादायक प्रकार उघडकीस आला आहे. Hadapsar परिसरातील काळेपडळ पोलीस ठाण्याच्या पथकाने छापा टाकून हा प्रकार उघड केला असून, एका सिलिंडरची तब्बल तीन हजार रुपयांना विक्री होत असल्याचे तपासात समोर आले आहे. या कारवाईत पोलिसांनी एकूण ११३ गॅस टाक्या जप्त केल्या असून, Nitin Hanumant Holkar (वय ३८, रा. हांडेवाडी) याला अटक करण्यात आली आहे. त्याच्याविरुद्ध अत्यावश्यक वस्तू अधिनियमाच्या कलम ३ आणि ७ अंतर्गत गुन्हा दाखल करण्यात आला आहे. आखातातील युद्धानंतर निर्माण झालेल्या गॅस टंचाईमुळे व्यावसायिक गॅसवर निर्बंध आले असून, अनेक उपाहारगृह व खानावळींना फटका बसला आहे. या परिस्थितीचा फायदा घेत काहीजणांनी काळाबाजार सुरू केल्याचे समोर आले आहे.
ही कारवाई गस्तीदरम्यान मिळालेल्या गुप्त माहितीच्या आधारे करण्यात आली. पोलीस कर्मचारी महादेव शिंदे यांना हांडेवाडी भागात एका घरातून घरगुती गॅस सिलिंडरमधून लहान टाक्यांमध्ये गॅस भरून विक्री केली जात असल्याची माहिती मिळाली. त्यानुसार पोलिसांच्या पथकाने तातडीने छापा टाकून मोठ्या प्रमाणात सिलिंडर जप्त केले. आरोपीकडून हे सिलिंडर कोणत्या गॅस एजन्सीतून मिळवले जात होते, याचा सखोल तपास सुरू आहे. या कारवाईत वरिष्ठ पोलीस अधिकारी Rajkumar Shinde आणि सहायक आयुक्त अतुलकुमार नवगिरे यांच्या मार्गदर्शनाखाली काळेपडळ पोलीस ठाण्याचे अधिकारी व कर्मचारी सहभागी झाले होते. पोलिसांच्या या कारवाईमुळे परिसरात खळबळ उडाली असून, अशा प्रकारांवर कडक कारवाई करण्याचा इशाराही प्रशासनाने दिला आहे.
