मुंबई : स्वातंत्र्यपूर्व काळापासून कार्यरत असलेला आणि मुंबईतील महत्त्वाच्या ठिकाणांपैकी एक असलेला भाऊचा धक्का आता कात टाकणार आहे. या धक्क्यावरून सुटणाऱ्या बोटींची क्षमता तब्बल १ हजाराने वाढणार आहे. त्यासाठी स्वतंत्र अशी मच्छिमार जेट्टी तेथे बांधली जाणार आहे. त्यामुळे प्रवासी बोटींनी प्रवास करणाऱ्या प्रवाशांना मोठा दिलासा मिळेल.
समुद्रमार्गे व्यापारी बोटी मुंबईत आल्यानंतर मराठी खलाशांना चिखलातून सामान किनाऱ्यावर उतरवावे लागत असते. त्यासाठी ‘भाऊ रसूल’ या नावे ओळखल्या जाणाऱ्या लक्ष्मण अजिंक्य यांनी माझगाव परिसरात बोटींसाठी १८४१ मध्ये धक्का, म्हणजेच जेट्टी उभी केली. त्यालाच ‘भाऊचा धक्का’ संबोधले जाते. पुढे जेएनपीटी उभे झाल्यानंतर या धक्क्यावर फक्त मच्छीमारांच्या बोटी येऊ लागल्या व त्यात आजही येतात. पण याच धक्क्याच्या शेजारी आता मुंबई-बेलापूर, मुंबई-मांडवा, मुंबई-मोरा अशा प्रवासी नौकादेखील सुटतात. त्यामुळे मच्छीमार आणि प्रवासी या दोघांचीही धक्क्यावर अनेकदा गर्दी होते. ही समस्या सोडविण्यासाठी मुंबई बंदर प्राधिकरण विशेष ‘मच्छीमार जेट्टी’ उभी करणार आहे. प्राधिकरणाचे उपाध्यक्ष आदेश तितरमारे यांनी सांगितले की, ‘ही मच्छीमार जेट्टी सध्याच्या धक्क्याचा विस्तार असेल. पण ती मच्छीमारांच्या गरजा लक्षात घेऊन त्यानुसार उभी केली जाईल. त्यामुळे मच्छीमारांच्या अधिक नौका तेथे उभ्या राहू शकतील. परिणामी प्रवासी बोटींच्या दिशेने असलेली गर्दी कमी होण्यास मदत होईल. पुढील आठवड्यात मुंबईत होणाऱ्या जागतिक समुद्री परिषदेच्या निमित्ताने या जेट्टीचे भूमीपूजन होईल.’ ही नवीन जेट्टी समुद्रावरच बांधली जात असल्याने त्याला पर्यावरण विभागाची परवानगी आवश्यक होती. ही परवानगी मिळत नसल्याने कंत्राटदार निश्चित होऊनही काम रखडले होते. आता मात्र जागतिक परिषदेच्या पार्श्वभूमीवर पर्यावरण विभागाकडून मंजुरीपत्र आले आहे. त्यामुळे भूमीपूजन होत असल्याची माहिती मुंबई बंदर प्राधिकरणाच्या अधिकाऱ्यांनी दिली.
अशी असेल नवीन जेट्टी
लांबी : १३० मीटर
रुंदी : ३० मीटर
सध्याच्या धक्क्याची क्षमता : ३०० बोटी
नवीन जेट्टीची क्षमता : १ हजार बोटी
बांधकामाचा कालावधी : दोन वर्ष