ठाणे : आजच्या महागाइच्या काळात पगारात भागवणे अवघड होत असल्याने अनेक जण पार्टटाइम जॉब अर्थात अर्धवेळ नोकरीतून अतिरिक्त उत्पन्न मिळवण्याचा प्रयत्न करतात. त्यातही घरबसल्या चांगल्या पगाराची अर्धवेळ नोकरीची संधी समोरून चालून आल्यास कोणीच ही संधी दवडणार नाही. मात्र, अशा एखाद्या नोकरीची ऑफर आल्यास सावधान राहा. कारण, आर्थिक उत्पन्न मिळण्याऐवजी तुम्ही जमा केलेली पुंजी कायमची गमावण्याची वेळ तुमच्यावर येऊ शकते. अर्धवेळ नोकरीचा मेसेज पाठवून सायबर गुन्हेगार नागरिकांची लाखो रुपयांची आर्थिक फसवणूक करत आहेत. अशाच प्रकारे ठाण्यातील एका लॅब टेक्निशियनची फसवणूक झाली आहे. गुन्हेगारांनी अर्धवेळ नोकरीचा मेसेज पाठवून यूट्युबवर काही टास्क दिले जातात. तसेच, खाते सबस्क्राइब केल्यास चांगले पैसे मिळतील, असे प्रलोभन दाखवून टेक्निशियनला सुरुवातीला कामाचे काही पैसे दिले. नंतर गुन्हेगारांनी या टेक्निशियनला आपल्या जाळ्यात ओढत टेक्निशियनची पाच लाखांपेक्षा जास्त रुपयांची फसवणूक केली.
अर्धवेळ नोकरीतून जास्त पैसे कमवण्याच्या मोहापायी उच्चशिक्षित लोकही फसवणुकीला बळी पडत असल्याचे दिसून येते. ठाण्यातीलच एका उच्चशिक्षित व्यक्तीला अर्धवेळ नोकरीचा मेसेज आला. शिवाय, त्यांना काही लिंक्सही पाठवण्यात आल्या होत्या. लिंक उघडून त्यांनी व्हिडीओवर लाइक आणि कमेंट केल्यानंतर या कामाचे त्यांना तीन हजार रुपये मिळाले. सायबर गुन्हेगारांनी त्यांना आणखी प्रलोभन दाखवत त्यांची तब्बल १७ लाखांची फसवणूक केली. एका सॉफ्टवेअर इंजिनीअरलाही गुन्हेगारांनी अशाच प्रकारे २० लाखांचा ऑनलाइन गंडा घातला होता. फसव्या टास्कच्या माध्यमातून सायबर गुन्हेगार नागरिकांना आर्थिक गंडा घालत असून, टास्क देऊन प्रत्येक टास्कच्या मोबदल्यात भरलेल्या रकमेपेक्षा ३० ते ५० टक्के जास्त रक्कम देण्याचे गुन्हेगार प्रलोभन दाखवतात. याच माध्यमातून एका व्यक्तीची तब्बल ८३ लाखांची फसवणूक केल्याचा प्रकार मध्यंतरी समोर आला होता. जास्त कमाईच्या लालसेपोटी नागरिक लाखो रुपये गमावत असून, ज्यावेळी नागरिकांना आपली फसवणूक झाल्याचे कळते, तेव्हा खूपच उशीर झालेला असतो. तोपर्यंत बँक खाते रिकामे झालेले असते.
खबरदारी महत्त्वाची
– घरबसल्या कुणीही हजारो रुपये देत नाही हे धान्यात असू द्या
– केवळ लाइक्स आणि टास्कला इतकी मोठी रक्कम कुणी देणार नाही
– कोणत्याही लिंकवर क्लिक करू नये
– अनोळखी व्यक्तीच्या समाजमाध्यमावरील ग्रुपमध्ये सहभागी होऊ नये
– उत्पन्नाचे साधन, रोजगार देणारे पैशांची मागणी करत नाहीत
– गुंतवणुकीवर बँकेच्या व्याजदरांपेक्षा अधिक परतावा मिळणे अशक्य
– त्यामुळे स्वतःकडील रक्कम ट्रान्सफर करू नये
– अनोळखी व्यक्तीला बँक, कार्डचा तपशील देऊ नये
फसवणूक झाल्यास
– मेसेजचा स्क्रिनशॉट काढून ठेवणे
– तत्काळ जवळच्या पोलिस ठाण्यात तक्रार देणे
– फसवणुकीबाबत cybercrime.gov.in या पोर्टलवर तक्रार नोंदवणे
– १९०३ हेल्पलाइनवर संपर्क करणे
