ठाणे : अमली पदार्थांच्या तस्करीचे रॅकेट ठाणे गुन्हे शाखेच्या अमली पदार्थविरोधी पथकाने उद्ध्वस्त करत, आठ आरोपींना अटक केली आहे. त्यांच्याकडून ५५ लाख ७३ हजारांचे अमली पदार्थ आणि ‘एमडी’ बनवण्यासाठी लागणारे साहित्य आणि रसायने जप्त केली आहेत. या आरोपींना एमडीनिर्मितीचा फार्म्युला देणाऱ्या आरोपीचा शोध घेण्यात येत असल्याचे गुन्हे शाखेचे पोलिस उपायुक्त शिवराज पाटील यांनी पत्रकार परिषदेत सांगितले. अमली पदार्थांची विक्री करणाऱ्यांचा शोध घेऊन कठोर कारवाई करण्याच्या सूचना पोलिस आयुक्त आशुतोष डुंबरे यांनी दिल्या होत्या. त्यानंतर ठाणे अमली पदार्थविरोधी पथकाने जयेश कांबळी उर्फ गोलू आणि विघ्नेश शिर्के उर्फ विघ्न्या यांना ७८ ग्रॅम एमडीसह अटक केली. त्यांना एमडीचा पुरवठा करणाऱ्या मुंबईतील कुर्ला येथील अहमद मोहम्मद शफी शेख उर्फ अकबर खाऊ आणि शब्बीर अब्दुल करीम शेख य़ांना वसईमधून पोलिसांनी जेरबंद केले. तसेच ड्रग्ज पुरवणाऱ्या कुर्ल्यातील मोहमद रईस हनिफ अन्सारी याला विरारमधून पोलिसांनी अटक केली होती. चौकशीत त्याने कुर्ल्यातीलच मोहम्मद आमीर अमनतुल्लाह खान एमडीचा पुरवठा करत असल्याचे स्पष्ट झाले. मोहम्मद आमीर याच्याही पोलिसांनी मुसक्या आवळल्या. त्याने मनोज पाटील उर्फ बाळा हा व्यक्ती एमडी पुरवत असून, एमडीच्या तस्करीमध्ये मनोजला गुजरातमध्ये अटक झाल्याचे सांगितले.
एमडीच्या गुन्ह्यात मनोज गुजरातमधील लाजपोर कारागृहात असताना, त्याला मार्च २०२३ मध्ये १५ दिवसांचा पॅरोल मिळाला होता. नंतर तो कारागृहात परतलाच नाही. मोबाइल कॉल न करता मनोज केवळ व्हॉट्सॲप कॉलद्वारे संपर्क करत होता. तसेच, तो सतत राहण्याचे ठिकाण बदलत असल्याने त्याला पकडणे अवघड झाले होते. तरीही तांत्रिक तपास करत मनोजला खालापूरमधून गेल्याच आठवड्यात पोलिसांनी अटक केली. मनोजचा सहकारी दिनेश म्हात्रे यालाही पोलिसांनी पकडले. हे दोघेही पेणचे राहणारे असून, एकूण आठ आरोपींना अटक केली आहे. आरोपींकडून ५५ लाख ७३ हजारांचे ड्रग्ज आणि अमली पदार्थ बनवण्याचे साहित्य, गाडी जप्त करण्यात आल्याचे पोलिस उपायुक्त शिवराज पाटील यांनी सांगितले. ही कामगिरी अमली पदार्थ विरोधी पथकाचे वरिष्ठ पोलिस निरीक्षक संजय शिंदे, सहायक पोलिस निरीक्षक निलेश मोरे, जगदीश गावीत, पोलिस उपनिरीक्षक दिपेश किणी यांच्या पथकाने केली.