मुंबई : नालेसफाईपाठोपाठ मुंबईकरांना कचरा आणि डिब्रिजच्या तक्रारींसाठी ७ जूनपासून ‘मुख्यमंत्री स्वच्छ मुंबई व्हॉट्सअप हेल्पलाइन’ची सुविधा ८१६९६८१६९७ या क्रमांकावर देण्यात आली आहे. ही सुविधा उपलब्ध होताच गुरुवारपर्यंत हेल्पलाइनवर एकूण ३१९ तक्रारी नोंदविण्यात आल्या आहेत. त्यातील कचरा आणि डेब्रिजशी संबंधित असलेल्या २५७ तक्रारी हाताळण्यात आल्या असून १७९ तक्रारी २४ तासांत सोडवण्यात आल्याची माहिती मुंबई महापालिकेने दिली. उर्वरित ७८ तक्रारीही लवकरच सोडवण्यात येणार आहेत.
हेल्पलाइनवर तक्रार प्राप्त होताच तातडीने कचरा आणि डेब्रिज उचलण्यात यावा. त्यासाठी मुंबई महापालिकेने यंत्रणा सतर्क ठेवण्याचे निर्देश मुख्यमंत्री एकनाथ शिंदे यांनी बुधवारी दिले होते. त्यानंतर हेल्पलाइनवर तक्रारी येताच त्या सोडवण्यासाठी पालिकेकडून प्रयत्न सुरू झाले आहेत. या हेल्पलाइनवर केवळ कचरा आणि डेब्रिजच्याच तक्रारींची नोंद घेतली जात आहे आणि त्याच तक्रारी सोडविण्यात येत आहेत. नागरिकांनी खासगी मालमत्ताशी संबंधित तक्रारी करू नयेत, असे आवाहन मुंबई महापालिकेने केले आहे. या हेल्पलाइनवर एकूण ३१९ तक्रारी आल्या आहेत. घनकचरा व डेब्रिजशी संबंधित १७९ तक्रारी लगेचच सोडविण्यात आल्या आहेत. तर घनकचरा व डेब्रिजवगळता इतर ५७ तक्रारी आहेत. त्यातील काही तक्रारी या खासगी मालमत्तांच्या आवारातील कचराबाबतच्या आहेत. अशा तक्रारी या हेल्पलाइनवर न करण्याचे आवाहन पालिकेने केले आहे.हेल्पलाइनवर तक्रार करताना किंवा कचऱ्याचे वा डेब्रिजचे छायाचित्रे काढताना मोबाइलवरील लोकेशन (ठिकाण) सुरू असणे गरजेचे आहे. काही नागरिकांनी छायाचित्र काढताना लोकेशन बंद ठेवले होते आणि घरी अथवा अन्य ठिकाणी केल्यावर लोकेशन ऑन करून कचऱ्याचा फोटो हेल्पलाइनवर अपलोड केला. त्यामुळे तक्रारींचा तपशील कळू शकत नसल्याचे सांगितले. या क्रमांकावर नागरिकांनी कचरा, डेब्रिज बाबत तक्रार नोंदविल्यानंतर त्यावर तत्काळ कार्यवाही केली जात आहे.
