डोंबिवली : राज्यातील अनेक भागांमध्ये निर्माण झालेल्या भीषण पाणीटंचाई आणि दुष्काळी परिस्थितीच्या पार्श्वभूमीवर डोंबिवलीतील शिंदे शिवसेनेकडून यंदाचा रासगरबा कार्यक्रम रद्द करण्याचा निर्णय घेण्यात आला आहे. दुष्काळामुळे शेतकरी, शेतमजूर आणि पशुधनावर गंभीर परिणाम झाला असून, अनेक भागांमध्ये पिकांचे नुकसान झाले आहे. या परिस्थितीत भव्य नवरात्रोत्सव साजरा करणे योग्य नसल्याचा विचार करून सुनीलनगर येथील डी. एन. सी. शाळेच्या मैदानावर होणारा रासगरबा रद्द करण्यात आला आहे. या माध्यमातून वाचलेला निधी दुष्काळग्रस्तांच्या मदतीसाठी देण्यात येणार असल्याचे जाहीर करण्यात आले आहे. डॉ. श्रीकांत शिंदे फाऊंडेशन, श्री नवदुर्गा युवा मंडळ आणि शिंदे शिवसेनेकडून हा निर्णय घेण्यात आला आहे. शिंदे शिवसेनेचे आमदार राजेश मोरे आणि जिल्हाप्रमुख गोपाळ लांडगे यांनी सुमारे दहा दिवसांपूर्वी याबाबत घोषणा केली होती. यावेळी साध्या पद्धतीने देवीची स्थापना करून नियमित पूजा, आरती आणि धार्मिक कार्यक्रम घेण्यात येतील, तर इतर भव्य कार्यक्रम आणि देखावे रद्द करण्यात येणार असल्याचे सांगण्यात आले होते. राज्यावर संकट असताना सामाजिक बांधिलकी म्हणून हा निर्णय घेण्यात आल्याचे पदाधिकाऱ्यांनी स्पष्ट केले. पूर, दुष्काळ किंवा अन्य संकटांच्या काळात डॉ. श्रीकांत शिंदे फाऊंडेशन आणि शिंदे शिवसेनेच्या माध्यमातून मदतकार्य करण्यात येत असल्याचेही यावेळी सांगण्यात आले.
मात्र, नवरात्रोत्सवासाठी डी. एन. सी. शाळेच्या मैदानात उभारण्यात येत असलेल्या मोठ्या मंडपामुळे नागरिकांमध्ये चर्चा सुरू झाली आहे. रासगरबा रद्द करून साधेपणाने उत्सव साजरा करण्याची घोषणा करण्यात आली असताना मंडप आणि शामियान्याची भव्यता कायम असल्याचे काही नागरिकांचे म्हणणे आहे. लाखो रुपयांचा खर्च होणाऱ्या या व्यवस्थेऐवजी तो निधी दुष्काळग्रस्तांसाठी वापरता आला असता, अशी प्रतिक्रिया काही डोंबिवलीकरांकडून व्यक्त करण्यात येत आहे. शाळेच्या बाहेरील पदपथावरही मंडप उभारण्यात आल्याने नागरिकांनी याबाबत प्रश्न उपस्थित केले आहेत. दरम्यान, या संदर्भात आमदार राजेश मोरे यांनी स्पष्टीकरण देताना सांगितले की, नवरात्रोत्सवातील रासगरबा पूर्णपणे रद्द करण्यात आला असून यावेळी कोणतेही भव्य कार्यक्रम होणार नाहीत. केवळ नियमित होमहवन, भजने आणि धार्मिक विधी सुरू राहणार आहेत. या धार्मिक कार्यक्रमांसाठी यजमान आणि पुरोहित उपस्थित राहणार आहेत. पावसामुळे धार्मिक विधींमध्ये अडथळा येऊ नये आणि व्यवस्था सुरक्षित राहावी, यासाठी मजबूत मंडप उभारण्यात आल्याचे त्यांनी स्पष्ट केले. रासगरबा रद्द करून वाचवलेला निधी दुष्काळग्रस्तांच्या मदतीसाठी देण्यात येणार असल्याचेही त्यांनी सांगितले. दुष्काळग्रस्तांच्या कल्याणासाठी नवरात्रोत्सवाच्या माध्यमातून मदतीचा संदेश देण्याचा प्रयत्न असल्याचे त्यांनी नमूद केले.
