मुंबई : लालबागच्या राजाच्या दर्शनासाठी देशभरातून येणाऱ्या लाखो भक्तांसाठी महत्त्वाची सूचना समोर आली आहे. अनंत चतुर्दशीच्या विसर्जन मिरवणुकीच्या तयारीमुळे लालबागचा राजा सार्वजनिक गणेशोत्सव मंडळाने दर्शन रांगा बंद करण्याचे वेळापत्रक जाहीर केले आहे. त्यामुळे ज्यांनी अद्याप दर्शन घेतले नसेल, त्यांनी वेळेत नियोजन करून दर्शनासाठी यावे, असे आवाहन करण्यात आले आहे. दरवर्षीप्रमाणे यंदाही लालबागच्या राजाच्या दर्शनासाठी मुंबईसह महाराष्ट्र, गुजरात आणि देशभरातून भाविक मोठ्या संख्येने येत आहेत. विसर्जनाच्या पूर्वतयारीसाठी अनंत चतुर्दशीच्या आदल्या दिवशी दर्शन रांगा बंद करण्याची परंपरा कायम ठेवण्यात आली आहे.
रांगा कधी बंद होणार?
- चरणस्पर्श दर्शन रांग: गुरुवार, २४ सप्टेंबर रोजी पहाटे ६:०० वाजता पूर्णपणे बंद करण्यात आली.
- मुखदर्शन रांग: गुरुवार, २४ सप्टेंबर रोजी रात्री १२:०० वाजता बंद करण्यात येणार आहे.
यानंतर मंडळाकडून विसर्जन मिरवणुकीची तयारी, धार्मिक विधी आणि मार्ग व्यवस्थापनाची कामे सुरू करण्यात येतील. अद्याप लालबागच्या राजाचे दर्शन झाले नसेल, तर मुखदर्शनाची रांग बंद होण्यापूर्वीच दर्शनासाठी येण्याचे नियोजन करावे. मोठी गर्दी लक्षात घेता पुरेसा वेळ हातात ठेवून येण्याचे आवाहन मंडळाने केले आहे. अनंत चतुर्दशीच्या दिवशी लालबागच्या राजाची भव्य विसर्जन मिरवणूक पार पडणार असून, लाखो भाविक या सोहळ्याचे साक्षीदार होणार आहेत.
