वृत्तसंस्था : तामिळनाडू सरकारने नवजात बालकांसाठी एक महत्त्वाकांक्षी योजना जाहीर केली असून, ‘थाईमामन थंगा मोतिरम थिट्टम’ अंतर्गत सरकारी रुग्णालयांमध्ये जन्मलेल्या प्रत्येक पात्र बाळाला १ ग्रॅम वजनाची सोन्याची अंगठी देण्यात येणार आहे. या योजनेचा शुभारंभ २८ सप्टेंबर रोजी मुख्यमंत्री यांच्या हस्ते होणार असून, सुरुवातीला ही योजना १५ सप्टेंबर रोजी सुरू होणार होती. मात्र, मुख्यमंत्र्यांच्या परदेश दौऱ्यामुळे उद्घाटन पुढे ढकलण्यात आले. राज्य सरकारने पहिल्या टप्प्यात १ लाख २८ हजार सोन्याच्या अंगठ्या खरेदी केल्या असून, २२ जून २०२६ पासून सरकारी रुग्णालयांमध्ये जन्मलेल्या पात्र बालकांना या योजनेचा लाभ दिला जाणार आहे. तामिळनाडूमध्ये दरवर्षी सुमारे ७.८ लाख बालकांचा जन्म होतो, त्यापैकी ४.२ लाखांहून अधिक प्रसूती सरकारी रुग्णालयांमध्ये होतात.
या योजनेचा लाभ फक्त तामिळनाडूचे कायमस्वरूपी रहिवासी असलेल्या आणि PICME (Pregnancy and Child Tracking System) मध्ये नोंदणी करून RCH ID प्राप्त केलेल्या मातांच्या नवजात बालकांनाच मिळणार आहे. २८ सप्टेंबरपासून सरकारी रुग्णालयातून डिस्चार्ज देताना पात्र बालकांना सोन्याची अंगठी प्रदान केली जाईल. प्रत्येक अंगठीवर स्वतंत्र अनुक्रमांक (Unique Serial Number) असणार असून, छेडछाड होऊ नये यासाठी विशेष सुरक्षित पॅकेजिंग करण्यात येणार आहे. योजनेअंतर्गत राज्यातील १०७ हब केंद्रांमधून दररोज १०० अंगठ्यांचे वितरण केले जाणार आहे. ही योजना केवळ तामिळनाडू राज्यापुरती मर्यादित असून, इतर राज्यांतील नागरिकांना किंवा सरकारांना या योजनेचा लाभ लागू होणार नाही.
