वृत्तसंस्था : तिरुपती बालाजी मंदिरातील प्रसिद्ध लाडू प्रसादासाठी वापरल्या जाणाऱ्या तुपात कथित भेसळ केल्याप्रकरणी अंमलबजावणी संचालनालयाने (ED) मोठी कारवाई करत ‘सुकृती फूड्स’चे मालक कैलास चंद मंगला यांना अटक केली आहे. ईडीच्या तपासानुसार, तिरुमला तिरुपती देवस्थानम (TTD) ला ‘अगमार्क स्पेशल ग्रेड गाईचे तूप’ म्हणून पुरवण्यात आलेले तूप प्रत्यक्षात रिफाइंड पाम तेल, पाम कर्नल ऑईल, पामोलिन तसेच विविध रसायनांचे मिश्रण असल्याचा आरोप आहे. हैदराबाद येथील ईडी कार्यालयाने १७ सप्टेंबर रोजी मंगला याला ताब्यात घेतल्यानंतर विशाखापट्टणम येथील पीएमएलए (PMLA) विशेष न्यायालयाने त्याला न्यायालयीन कोठडी सुनावली आहे. तपासात २०१९ ते २०२४ या कालावधीत टीटीडीला पुरवण्यात आलेल्या कथित बनावट तुपाची किंमत सुमारे २३० कोटी रुपये असल्याचे समोर आले असून, त्यापैकी ९६ कोटी रुपयांचे भेसळयुक्त तूप तयार करण्यात आल्याचा दावा ईडीने केला आहे.
ईडीच्या माहितीनुसार, हे कथित भेसळयुक्त तूप रिफाइंड पाम तेल, पाम कर्नल ऑईल, पामोलिन तसेच MG-90, मोनोग्लिसराइड्स, मायव्हासेट सॉफ्ट 400 आणि ॲसिटिक ॲसिड एस्टर्स यांसारख्या रसायनांचा वापर करून तयार करण्यात आले होते. तपासात कैलास मंगला हा या संपूर्ण रॅकेटमधील प्रमुख सूत्रधारांपैकी एक असल्याचे समोर आले असून, त्याने स्वतःच्या कारखान्यात हे तूप तयार केल्याचा आरोप आहे. तसेच ‘श्री वैष्णवी डेअरी स्पेशालिटीज’, ‘मालगंगा मिल्क अँड ॲग्रो प्रॉडक्ट्स’ आणि ‘ए.आर. डेअरी फूड्स’ या कथित डमी कंपन्यांच्या माध्यमातून टीटीडीला पुरवठा करण्यात आल्याचे तपासात उघड झाले आहे. भेसळ लपवण्यासाठी गाईच्या तुपाच्या आणि पाम तेलाच्या खरेदी-विक्रीच्या बनावट नोंदी तयार करून अस्सल तूप पुरवल्याचा आभास निर्माण करण्यात आल्याचाही ईडीचा दावा आहे. या प्रकरणाचा पुढील तपास सुरू असून आणखी काही आरोपींवर कारवाई होण्याची शक्यता व्यक्त केली जात आहे.
