मुंबई : मुंबईतील मालाड परिसरात असलेल्या ‘ब्लिंक कॉमर्स प्रायव्हेट लिमिटेड’ (ब्लिंकिट) या क्विक-कॉमर्स कंपनीच्या गोदामावर अन्न व औषध प्रशासनाने (एफडीए) धडक कारवाई करत अन्न सुरक्षा नियमांच्या गंभीर उल्लंघनाप्रकरणी गोदामाचा अन्न परवाना पुढील आदेशापर्यंत तात्काळ निलंबित केला आहे. एफडीएच्या अधिकाऱ्यांनी अचानक केलेल्या तपासणीत गोदामातील अत्यंत अस्वच्छ परिस्थिती आणि अन्नसुरक्षेशी संबंधित अनेक गंभीर त्रुटी उघडकीस आल्या. फळे आणि भाजीपाला साठवून ठेवलेल्या विभागात मोठ्या प्रमाणावर झुरळे, कीटक आणि अस्वच्छता आढळून आली. तसेच अनेक खाद्यपदार्थ थेट जमिनीवर आणि गंज लागलेल्या रॅक्सवर ठेवण्यात आल्याचे अधिकाऱ्यांच्या निदर्शनास आले. यामुळे अन्न दूषित होण्याचा गंभीर धोका निर्माण झाल्याचे एफडीएने नमूद केले आहे. तपासणीदरम्यान गोदामातील कोल्ड रूममध्ये मुदतबाह्य झालेली उत्पादने तसेच पॅकेजिंगशी छेडछाड केलेले अन्नपदार्थही साठवून ठेवण्यात आल्याचे आढळले. अन्नपदार्थांच्या सुरक्षित साठवणुकीसाठी आवश्यक असलेल्या नियमांचे पालन होत नसल्याचेही स्पष्ट झाले. याशिवाय गोदामामध्ये कचरा व्यवस्थापनाची प्रभावी यंत्रणा नसल्याचे आणि नियमित कीटकनियंत्रण (पेस्ट कंट्रोल) करण्यात येत नसल्याचेही तपासणीत समोर आले. अशा प्रकारच्या त्रुटींमुळे ग्राहकांच्या आरोग्यावर गंभीर परिणाम होण्याची शक्यता लक्षात घेऊन एफडीएने तातडीने कारवाई केली. अन्नसुरक्षा आणि मानके कायद्यानुसार आवश्यक स्वच्छता, साठवणूक आणि गुणवत्ता नियंत्रणाचे नियम पाळणे प्रत्येक अन्न व्यवसायासाठी बंधनकारक असताना या गोदामात त्याकडे दुर्लक्ष झाल्याचे अधिकाऱ्यांनी नमूद केले.
तपासणीदरम्यान अन्नपदार्थांची थेट हाताळणी करणाऱ्या कर्मचाऱ्यांच्या आरोग्यविषयक नोंदीही उपलब्ध नसल्याचे आढळले. अन्न व्यवसायाशी संबंधित कर्मचाऱ्यांची नियमित वैद्यकीय तपासणी करणे आणि त्याची नोंद ठेवणे हे नियमांनुसार अनिवार्य असते. मात्र, गोदाम प्रशासनाकडे अशा तपासणीची कोणतीही कागदपत्रे किंवा नोंदी उपलब्ध नव्हत्या. त्यामुळे अन्नपदार्थांच्या सुरक्षिततेबाबत अधिक गंभीर प्रश्न निर्माण झाले. एफडीएने या सर्व बाबींची गंभीर दखल घेत गोदामाचा अन्न परवाना तात्काळ प्रभावाने निलंबित केला आहे. या निलंबनाच्या कालावधीत संबंधित गोदामातून कोणत्याही प्रकारच्या अन्नपदार्थांची विक्री, साठवणूक किंवा वितरण करण्यास सक्त मनाई करण्यात आली आहे. आवश्यक सुधारणा करून अन्न सुरक्षा नियमांचे पूर्ण पालन केल्याशिवाय गोदाम पुन्हा सुरू करण्यास परवानगी दिली जाणार नाही, असा इशाराही प्रशासनाने दिला आहे. अन्नसुरक्षेशी कोणतीही तडजोड सहन केली जाणार नसल्याचे स्पष्ट करत एफडीएने राज्यातील सर्व अन्न व्यवसायिकांनी स्वच्छता, गुणवत्ता आणि अन्न सुरक्षा नियमांचे काटेकोर पालन करण्याचे आवाहन केले आहे. ग्राहकांच्या आरोग्याशी संबंधित बाबींमध्ये निष्काळजीपणा करणाऱ्यांविरोधात अशाच प्रकारच्या कठोर कारवाया पुढेही सुरू राहतील, असा स्पष्ट संदेश या कारवाईतून देण्यात आला आहे.
