मुंबई : सायबर ठगांना म्युल अकाऊंट उपलब्ध करून देणाऱ्या मुख्य आरोपीला खार पोलिसांनी अटक केली आहे. अविनाश बाळासाहेब खरात असे अटक करण्यात आलेल्या आरोपीचे नाव असून, फसवणुकीच्या या गुन्ह्यात तो सध्या पोलीस कोठडीत आहे. त्याचा मित्र विकास गजानन भुजबळ याने या गुन्ह्यांत त्याला मदत केली असून, त्याला पाहिजे आरोपी दाखविण्यात आले आहे. त्याच्या अटकेसाठी पोलिसांनी विशेष मोहीम हाती घेतली आहे. खार पोलिसांनी अलीकडेच फसवणूक आणि आयटी कलमांतर्गत गुन्हा दाखल करून आरोपींचा शोध सुरू केला होता. टेलिग्रामद्वारे संपर्क साधून अज्ञात सायबर ठगांकडून विविध तरुणांना पेड टास्क देण्यात येत होते. मात्र, काम पूर्ण करूनही तरुणांना कमिशन अथवा मूळ रक्कम न देता त्यांची फसवणूक केली जात होती. या प्रकरणाची गंभीर दखल घेत पोलिसांनी तपास सुरू केला.
फसवणुकीची रक्कम ज्या बँक खात्यांमध्ये ट्रान्सफर झाली होती, त्या खात्यांची माहिती पोलिसांनी मिळवली. त्यातून काही संशयितांची नावे समोर आली. त्यामध्ये अविनाश खरात आणि विकास भुजबळ यांचा समावेश होता. त्यामुळे दोघांच्या अटकेसाठी विशेष मोहीम राबविण्यात आली. शोधमोहीम सुरू असताना मिळालेल्या तांत्रिक माहितीच्या आधारे वरिष्ठ पोलीस निरीक्षक संतोष काटे यांच्या पथकातील पोलीस निरीक्षक दिपाली मरळे, पोलीस उपनिरीक्षक विजय सैद, गोविंद बेडके, पोलीस हवालदार नागेश पाटील, पोलीस शिपाई रुपाली मोटे आणि गणेश लोटे यांनी अविनाश खरात याला ताब्यात घेतले. चौकशीत या गुन्ह्यातील त्याचा सहभाग उघडकीस आला. अविनाश खरात आणि विकास भुजबळ यांनी सायबर ठगांना फसवणुकीसाठी म्युल अकाऊंट पुरविल्याचे तपासात समोर आले आहे. दोघांनी स्वतःसह विविध व्यक्तींच्या नावाने वेगवेगळ्या बँकांमध्ये एकूण २२ खाती उघडली होती. त्यापैकी १३ खाती अविनाशने, तर ९ खाती विकासने उघडून दिली होती. या खात्यांची माहिती सायबर ठगांना दिल्यानंतर त्यामध्ये देशभरातील विविध फसवणुकीच्या गुन्ह्यांतील ७ कोटी ४२ लाख २८ हजार ४०९ रुपये जमा झाल्याचे उघडकीस आले आहे. या प्रकरणी पोलिसांना देशभरातील एकूण ४२ फसवणुकीच्या तक्रारी प्राप्त झाल्या आहेत. याच बँक खात्यांमधून इतर गुन्ह्यांतील कोट्यवधी रुपयांचे व्यवहार झाल्याचेही तपासात दिसून आले आहे. सायबर ठगांना म्युल अकाऊंट पुरविणारी ही सराईत टोळी असल्याचा पोलिसांचा संशय असून, टोळीतील इतर सदस्यांचा शोध घेऊन त्यांच्या अटकेसाठी पोलिसांनी विशेष मोहीम सुरू केली आहे.
