मुंबई : अन्न व औषध प्रशासनाने (एफडीए) मुंबईतील जोगेश्वरी (पश्चिम) परिसरात मोठी कारवाई करत १० लाख ९३ हजार ६९२ रुपये किमतीचा बिनलेबल टॉयलेट साबणाचा साठा जप्त केला आहे. ग्राहकांच्या आरोग्याशी संबंधित नियमांचे उल्लंघन केल्याप्रकरणी संबंधित विक्रेत्याविरुद्ध कायदेशीर कारवाई सुरू करण्यात आली आहे. एफडीएच्या बृहन्मुंबई विभागाच्या पथकाने १४ जुलै २०२६ रोजी जोगेश्वरी (पश्चिम) येथील कादर इस्माईल इस्टेट, मोमीन कॉलनीजवळील पटेल इस्टेट रोडवरील मेसर्स जे. के. सोप बाजार या आस्थापनावर छापा टाकला. तपासणीदरम्यान विक्रीसाठी ठेवण्यात आलेल्या मोठ्या प्रमाणातील टॉयलेट साबणांवर कायद्याने अनिवार्य असलेली माहिती नमूद नसल्याचे आढळून आले. या उत्पादनांवर बॅच किंवा लॉट क्रमांक, उत्पादन दिनांक, ‘यूज बिफोर’ची मुदत, उत्पादन परवाना क्रमांक तसेच उत्पादकाचे नाव आणि पत्ता यांसारखी आवश्यक माहिती नव्हती. औषधे व प्रसाधने कायद्यानुसार अशी माहिती नमूद करणे बंधनकारक असून, तिच्याशिवाय सौंदर्यप्रसाधनांची विक्री करणे कायद्याचे उल्लंघन मानले जाते. त्यामुळे एफडीएने संपूर्ण माल जप्त करून त्यातील दोन नमुने प्रयोगशाळेत विश्लेषणासाठी पाठवले आहेत. या प्रकरणात संबंधित विक्रेते नबी उल्लंघा यांच्याविरुद्ध आवश्यक कायदेशीर कारवाई सुरू असल्याची माहिती प्रशासनाने दिली आहे.
या कारवाईबाबत अन्न व औषध प्रशासनाचे आयुक्त तुकाराम मुंढे यांनी सांगितले की, नागरिकांच्या आरोग्याचे संरक्षण हे एफडीएचे सर्वोच्च प्राधान्य असून आवश्यक लेबलिंगशिवाय कोणतेही सौंदर्यप्रसाधन बाजारात विक्रीस ठेवणे ही अत्यंत गंभीर बाब आहे. अशा उत्पादनांचा उगम, गुणवत्ता आणि सुरक्षितता पडताळणे कठीण होत असल्याने नियमांचे उल्लंघन करणाऱ्या उत्पादक, वितरक आणि विक्रेत्यांविरुद्ध कठोर कायदेशीर कारवाई करण्यात येणार असल्याचा इशाराही त्यांनी दिला. तसेच ग्राहकांनी कोणतेही सौंदर्यप्रसाधन किंवा वैयक्तिक वापराची उत्पादने खरेदी करताना त्यावरील उत्पादन दिनांक, वापरण्याची अंतिम मुदत, परवाना क्रमांक आणि उत्पादकाची माहिती तपासूनच खरेदी करावी, असे आवाहनही करण्यात आले आहे. दरम्यान, एफडीएने अलीकडेच मुंबईतील भेंडी बाजार आणि उमरखडी परिसरातील सहा हॉटेल्सची तपासणी केली होती. त्यामध्ये स्वच्छता आणि अन्न सुरक्षा नियमांचे गंभीर उल्लंघन आढळल्याने तीन हॉटेल्सचे परवाने निलंबित करण्यात आले होते. राज्यभर अन्न सुरक्षा आणि ग्राहक संरक्षणासाठी एफडीएकडून अशाच धडक तपासण्या आणि कारवाया पुढेही सुरू राहणार असल्याचे प्रशासनाने स्पष्ट केले आहे.
